Bayern an CHAK LO leh tawh!

Bayern Munich-in Julian Nagelsmann an ban hnuah 'hlim ni' aiin 'thinur ni' an ngah ta zawk. Thomas Tuchel hnuaiah Bavarians hi DFB Pokal leh Champions League aṭangin an tla nghal a, an champion ngeina tura ngaih Bundesliga-ah pawh pahnihnaah an tla thla ta bawk.

Inrinni zan khan Bayern-in Mainz an tlawh a, Sadio Mane (29') hmangin goal khung hmasa mah se mualneitu hian Ludovic Ajorque (65'), Leandro Barreiro (73') leh Aaron Caricol (79') te hmangin an chhanglet. Mainz hi 3-1 in an chak a, Tuchel-a hote erawhin kartawpah point an hlawh chhuak lo.

Inkhel dangah Borussia Dortmund-in an hun ṭha an bawhpelh tawh lo. Signal Iduna Park-ah Dortmund hian Eintracht Frankfurt chu 4-0 in an hneh a; Donyell Malen-a'n goal hnih a khung bakah Jude Bellingham leh Mats Hummels ten an khung bawk.

Match 29 khelh zawhah Dortmund hian point 60 an hmu a, Bayern aiin point khatin an hmu tam zawk. Edin Terzic-a hote hian Bavarians ṭum hnih an hmachhawn tawh a, an khelh hmabak an chak vek chuan an champion dawn.

Bundesliga-ah hian club 18 chauh an awm avangin match nga chauh khelh tur a awm tawh. Dortmund hmachhawn turte hi VfL Bochum, Wolfsburg, Borussia Monchengladbach, Augsburg leh Mainz te a ni a, captain Marco Reus leh a ṭhianten nomawi chawi an inbeisei a nih pawhin thil awm tak a ni ta.

Bayern erawh Tuchel hnuaiah insiam ṭhat a hnekin tlak hniam lam an pan zel. Bavarians hian Dortmund hneh nghal mah se result a ṭhat chhunzawm loh avangin team boruak a chhia.

Sadio Mane-a'n Man City an hneh loh ṭumin dressing room-ah a teammate Leroy Sane a hnek. Hei chauh hi a ni lo a, Nagelsmann-a bantu club thuneitute inkarah buaina a awm niin sawi a ni bawk.

Kum 2013 aṭang khan Bayern hian nomawi an la chawi char char a, kuminah erawh Dortmund dinhmun a ṭha ta zawk. Chutihrualin season a la tawp lo tih hriat a ṭha.