Mbappe hoin Paris Saint Germain an chak

Paris Saint Germain chuan Kylian Mbappe-a goal hnih hmangin Angers 2-1 in an hneh. Paris club tan Ligue 1 nomawi a hnaih zel a, chak lo Angers erawh France ram football inelna sang ber aṭangin an tla ngei dawn niin a lang ta.

Zirtawpni zan inkhelah PSG tan Mbappe hian minute kuana lekah goal hmahruai a khung, a pet hmasak fuh tawk lo mah se vir puiin a khung zui ta tho. A goal hnihna chu Lionel Messi siamsak aṭanga a khung a ni thung.

Mualneitu Angers tan Sada Thioub-a'n hun tawp dawnah goal khung ve mah se awmzia a nei phak tawh lo, tun season chhunga a 24 nan an tlawm. Match 32 aṭanga point 14 chauh an la hlawhchhuah avangin an inhmang dawn lo tia sawi ngam a ni tawh.

PSG coach Christophe Galtier chuan, "Kan result leh first half kan khelh danah ka lawm, second half kan khelh dan erawh duhthusam lo lai a awm. Hnehna kan chan hian Ligue 1 nomawi kan hnaih tial tial tihna a ni a, a tawp hma chuan kan chawl thiang lo," a ti.

French champion hian an duh ber Champions League nomawi an chawi thei lo, tun season atan chuan Ligue 1 hi an beisei theih sang ber a ni. Club thuenitu lam hi league title ringawt chuan an lungawi a rinawm loh, nipuiah an insiksawi ngeiin a rinawm.

Messi-a contract neih lai hi tun season tawp rualin a zo dawn. Argentina hi a club hlui Barcelona nen sawi zawm mek a ni - Paris club tan a khel chhunzawm dawn a nih chuan PSG hian squad an thuam chhah zual a ngai dawn niin a lang.