Hero Super Cup - Final khel tur a chiang ta

Indian Super League leh I League club te inelna Hero Super Cup semifinal chu khelh zawh a ni ta a, Bengaluru leh Odisha ten an khingpui ve ve hnehin final an khel dawn - Thawhlehni zan dar 7:00-ah final hi khelh tur a ni.

Zirtawpni zan khan Bengaluru hian 2-0 in Jamshedpur an hneh a, Bangalore club tan Jayesh Rane leh Sunil Chhetri te chuan goal khat ve ve an khung a, Men of Steel-in a chhanletna tur an nei lo.

Inrinni zan khan Odisha FC chuan 3-1 in NorthEast United an hneh ve bawk. Odisha tan Nandha Kumar chuan goal hnih khungin Diego Mauricio chuan goal khat a thawh ve bawk a, Highlander tan Wilmar Jordan chuan goal khat a khung thung.

JFC an vanduai

EMS Corporation Stadium-a inkhelah Jamshedpur an hlauhawm a, mahse, Bengaluru keeper Gurpreet Singh Sandhu chet ṭhat zan an tawng a, an vanduai takzet - Jay Emmanuel-Thomas, Daniel Chima Chukwu leh Boris Singh ten chance duhawm nei vek mah se goal-ah an chantir thei lo.

Bengaluru erawhin an chance neih hmasak berah, Aizawl FC midfielder hlui Jayesh Rane hmangin minute 67-naah goal hmahruai an khung a, minute 83-naah Chhetri chuan a khung ve bawk. Hetihlai hian Roy Krishna chuan Rehenesh T.P. chiah hmachhawn chungin a khung thei lo a, a 'shot' pakhat, Rehenesh-a dan per erawh Chhetri chuan goal ruakah a khung.

JFC tan Ricky Lallawmawma leh Laldinliana Renthlei ten inkhel bul an ṭan a, hun tawp hnaih lamah JFC tan Harry Sawyer chuan chance nei ve mah se, goal-ah a chantir thei lo.

Goal lut a tam

NE United-in Odisha lakah goal khung turin minute hnih chiah an mamawh a, Rochharzela siamsak chu Wilmar Jordan chuan hnai set sawt aṭangin a khung - tun inelnaa goal sarih a khungna chiah niin, chak beiseina a awm hman.

Mahse, Mizo hming a lang leh a, tun ṭum erawh Odisha lam a ni thung - Jerry Mawihmingthanga siamsak hmangin Nandha Kumar chuan minute 10-naah si phurh a sut nghal a, minute 63-naah Nandha hian chiang zeta belhchhahin, Mauricio chuan minute 86-naah chak nemnghehna goal a khung.

Highlander tan Jordan chuan goal khung lehna remchang nei mah se bench aṭanga luhtir, R. Laldanmawia ball dan per chu hnai tak aṭangin a pet lut lo a, Odisha defender rual a bum hnuah uiawm takin a khung lo bawk. Odisha tan hian Paul Ramfangzauva leh Isak Vanlalruatfela chu bench aṭanga luhtir an ni.