Brighton aia vannei zawk Man United

Manchester United chuan penalty shootout hmangin Brighton & Hove Albion an hneh a, FA Cup 'dream final' hmuh tur a awm dawn. FA Cup final-ah Erik Ten Hag-a hoten Manchester City an hmachhawn dawn a, FA Cup final-a Manchester Derby hmasa ber tur a ni.

Pathianni zan khan FA Cup semifinal hnuhnung zawk khelh a ni a, Man United leh Brighton te inhmachhawnin minute 120 chhungin goal a lut lo. Penalty shootout-ah Man United aṭanga pet mi pasarihten an pet goal vek laiin Brighton winger Solly March-a'n a pet over a, Man United 7-6 in an vannei.

Maguire a tel lo

Man United-in Europa League-ah Sevilla an hneh lo a, Europe inelna lian ber dawttu aṭangin an tla. English club chak loh chhanah Harry Maguire-a'n mawh a phur a, an lamah a tihluh bakah Sevilla-in goal an khung theih nan a siamsak.

FA Cup semifinal-ah erawh Maguire hi squad-ah a dah a ni lo a, Man United ṭantute pawi an ti kher lo ang. Chutihrualin England international defender Maguire-a tel loh chhan hi yellow card vawi hnih a hmuh vang a ni.

United captain Maguire bakah hian Raphael Varane leh Lisandro Martinez te an inhliam vangin Ten Hag-a'n defence laiah Victor Lindelof leh Luke Shaw te a hmang. Mual vei lamah Tyrell Malacia hmang loin Diogo Dalot a hmang bawk.

Semifinal chu

Man United hming a lian zawk a, City-in final an luh tawh bawk avangin Ten Hag-a hote hi Wembley Stadium-a inlan nawn tura thlanawm zawk a ni.

Amaherawhchu, Brighton-in ṭan phat aṭangin team ṭha an ni tih an lantir a, Argentine midfielder Alexis Mac Allister-a'n freekick aṭangin keeper David de Gea hna a siam nghal.

Seagulls-in ball an chang tam zawk a, an passing a mawi zawk a, United chhuanvawr Marcus Rashford pawh an dah bo. Chutihrualin Bruno Fernandes hmangin Man United-in hmahruai theihna hun an nei ve tho bawk.

Second half-ah pawh Brighton bawk an hlauhawm a, Julio Enciso ball pet De Gea dan hman chu pui tak a ni. De Gea bawk hian March-a ball pet chu dang per deuh mah se Pascal Gross a tlawh hmain a dang hman.

Hun pangngaiah goal a lut lo a, extra time-ah Man United an insiamṭha hret. Rashford-a theihna hmuhin a awm a, Seagulls keeper Robert Sánchez-a'n hming chher nan a hmang.

Japanese winger Kaoru Mitoma a hmunawm a, Man United tlarhnung tan a hnawksak. Chutihrualin nikum World Cup-a Germany ṭantute veltu Mitoma hian goal a khung thei bik lo a, penalty hmanga chak zawk zawn a ngai.

Penalty chu

Ruahsur hnuaiah De Gea inpuahchahna a ṭha a, Brighton pet dawn apiangin a petna lam tur inziahna chu a enzel. Amaherawhchu, football-a sang ber thleng tawhten an sawi angin penalty erawh zir lawk theih a ni lo, inpuahchahna ang vekin thil a thleng lo.

De Gea hian save a nei lo a, a ring dik meuh lo. Chutihrualin penalty pettuten an pet ṭha hrim hrim a, Brighton keeper Sánchez pawhin save a nei bik lo. A pet hmasa 12-in an pet goal hnuah vawi 13-naa pettu March-a'n a pet over a, Man United tan Lindelof-a'n ṭha zetin chakna goal a khung.