FA Cup final-a Manchester Derby hmasa ber

25th April, 2023

FA Cup nomawi inchuhna chu June 3, Inrinni zan dar 7:30 hian Wembley Stadium-ah Manchester City leh Manchester United ten an khel dawn. FA Cup final-a Manchester Derby hmasa ber a ni dawn.

Manchester Derby hrim hrim hi chu vawi 189 khelh a ni tawh a, FA Cup final-ah an la hmachhawn lo thung. November 12, 1881 khan Manchester Derby hmasa ber khelh a ni a, club hming pawh St. Mark's (West Gorton) leh Newton Heath LYR tih a ni daih.

Man City hi kum 1880 khan din a ni a, a hming hmasa ber chu St. Mark's (West Gorton) tih a ni. Kum 1887 aṭang khan Ardwick Association Football Club tih a ni leh a, kum 1984 aṭangin Manchester City hming a pu thung.

Man United hi Cityzens aiin kum hnihin a upa hret a, kum 1878-a din niin a hming hmasa chu Newton Heath LYR F.C. tih a ni. April 24, 1902 aṭang khan Manchester United hming hi a pu thung.

Man United hi sulhnu nei ṭha zawk an nih angin record pawh an nei ṭha zawk a, vawi 78 an chak. City hi vawi 58 an chak a, vawi 53 an inhnektawk thung.

Manchester Derby-a goal khung tam ber chu Wayne Rooney a ni a, goal 11 a khung. Man United legend tho Ryan Giggs chu derby match khel tam ber niin vawi 36 a inlan hman.

FA Cup bikah hian derby match ṭum kua khelh a ni tawh a, Man United hi vawi ruk chakin City hi vawi thum an chak. Erik Ten Hag-a hote hian Man City hi an hmachhawn hnuhnun berah 2-1 in an hneh a, chutihrualin nikum October thla khan Pep Guardiola hote hian Man United hi 6-3 in an sawp tih hriat a ṭha.

Manchester City hian Pep Guardiola hnuaiah record duhawm tak an nei a, Premier League leh League Cup-ah vawi li ve ve an champion tawh. Amaherawhchu FA Cup bikah hian Pep-a hnuaiah City hi vawi khat chiah an la champion.

Tun ṭum FA Cup hi ṭum dang zawng aiin Pep-a leh City tan a pawimawh dawn a, a chhan chu treble champion thei dinhmuna an la din vang a ni. Kum 1999-a Alex Ferguson-a kaihhruai Man United-in nomawi lian pathum an chawi hnuah English club zingah treble champion thei an awm lo a, Pep-a hote hi treble champion leh thei dinhmunah an ding a ni.