Stuttgart Open champion Swiatek

Iga Swiatek chuan straight set hmangin Aryna Sabalenka a hneh a, nomawi a kawl mekna Stuttgart Open-ah a zawnin a champion. French Open inbuatsaihna ṭha takin a nei thei tihna a ni.

Poland nula hian Pathianni zan final inkhelah Sabalenka hi 6-3, 6-4 in a hneh. Tun hnai khan a khel bawr hliam vangin Miami Open leh Billie Jean King Cup khel thei lo mah se, tunah chuan a duh ang takin a khel thei leh tawh.

Stuttgart Open bikah hian a zawna champion thei an tam lo, kum 2015 leh 2016 kha Angelique Kerber chu a zawnin a champion, a hnu lamah chuan Swiatek hi title humhim leh thei hmasa ber a ni hial. Salablenka erawh a zawnin kum thum final-ah a chak lo.

World number 1 Swiatek chuan, "Ka taksa dinhmun ngaihtuah a ngai a, ka tana ṭha ber tur eng nge tih pawh hriatthiam a harsa ṭhin hle. Chutiang karah chuan team lamin ka kal dan tur ṭha taka min ruahmansak avangin ka lawm," a ti.

Swiatek hian WTA inelna hnuaiah final vawi 13 a khel tawh a, ṭum 10 a champion. Tun anga a khel pangngai chho a nih chuan May thla chawhnu lama khelh tur French Open atan pawh rinkai ber a ni leh ang.