Warriors leh Knicks an chak

NBA champion lai Golden State Warriors an talbuai a, a tawpah erawh vannei takin an chak. Warriors hian Sacramento Kings chu 126-125 in an hneh a, best of seven series khelh turah team pahnih hi 2-2 in an inhnehtawk mek.

Seeded pathumna Kings hi quarter thumna an khelh lai chuan 102-92 zetin an hniam zawk, mahse Stephen Curry chetsual hnuah an phur thar a, a tawp lam minute khat pawh awm tlin tawh loh thlengin beisei an nei zui.

Second a kal zo mai dawn a, hun tam a awm tawh l. Kings an hniamna chu 126-125 chauh a ni a, ball kengtu an ni bawk - hamrik hnuhnung ber rik ruala basket neih kha chak nan a tawk tih pawh an hrechiang hle.

Hun tawp rualin Harrison Barnes-a'n 3-points neih tumin a vawm a, mahse a hlah. Anmahni mualah Warriors kha chak lo ni se la chuan hna a hautak tawh khawp ang, tunah erawh conference semifinal khel turin beisei an nei sang leh ta.

Warriors tan hian NBA Most Valuable Player vawi hnih ni tawh Curry chuan point 32 a nei a, an team tana nei hnem ber a ni. Klay Thompson (26), Jordan Poole (22) leh Andrew Wiggins (18) ten an thawhhlawk hle bawk.

April 27, Ningani zing dar 7:30 hian Golden 1 Center-ah game 5 an khel leh ang, mikhual Warriors tan fimkhur a ngai dawn - a zawna vawi hnih an chak loh tawhna hmun kha a ni.

Inkhel dangah New York Knicks chuan Cleveland Cavaliers 102-93 in an hneh a, series-ah 3-1 in hma an hruai ta. Conference semifinal lut turin vawi khat chak chauh an hmabak tawh, an dinhmun a ṭha ta hle.

Madison Square Garden-a inkhelah Knicks tan Japen Brunson chuan point 29 a nei, an tlang thei a nih chuan an tan chanchin dauhawm a ni dawn, kuminah hian 2013 season hnua a vawi khat nan conference semifinal khel an beisei ve leh mek a ni.

Nimin zing inkhel dangah Boston Celtics chuan Atlata Hawks chu 129-121 in an hneh a, series-ah 3-1 in hma an hruai. Minnesota Timberwolves pawhin Denver Nuggets chu 3-1 in an hneh, anni pawhin tlang turin match khat chauh an mamawh tawh a ni.