Barcelona tan champion a hnai ta

Pathianni zan La Liga inkhelah Barcelona chuan 1-0 in Atletico Madrid an hneh a, champion an hnaih zel - an hnuai chiaha awm Real Madrid aia an sanna chu point 11 a nih chhunzawm a, match riat chiah khelh tur a awm tawh avangin champion chance a sang ta hle. Real hi zanin dar 11:00-ah an inlan dawn a, Girona an lenchilh ang.

Barcelona tan Ferran Torres chuan inkhela goal awmchhun a khung a, Atletico-in a chhanletna tur an nei lo - Diego Simeone naute hi table-ah erawh pathumna an nih chhunzawm a, season tharah Champions League an khelh ngei a rinawm.

Griezmann a vanduai

Nou Camp-ah boruak a sang a, mahse, chance nei hmasa zawk erawh Barcelona ni loin mikhual Atletico Madrid an ni.

Sergio Busquets-a ball hloh aṭanga ball kal zel chu Antoine Griezmann chuan goal-ah a pet a, crossbar a pet per - he thil a thlen hian minute khat chiah an la khel!

Barcelona aṭanga Atletico lama kir Griezmann hian chance duhawm dang pawh a neih belh leh a, mahse, Barca keeper ṭha mi Marc-André ter Stegen chuan ṭha zetin a dansak - French forward vanneih zan a ni lo.

Hei le Torres

Nou Camp-ah Atletico an hlauhawm zawk a, mahse, an chance neih an chhawr miau loh avangin goal khungtu chu Barcelona an ni - team pahnihin goal khung loin chawlhlawk an hmang mai dawn niin a lang hman a, mahse, minute 44-naah Torres a inlar.

Raphinha chuan ṭha zeta ball a luhpui hnuah Torres tan a siamsak a, Manchester City forward hlui hian harsatna nei loin goal-ah a lo chantir - league match hnih zet a zawna goal an khung loh hnuah Barca-in goal an khung ve leh ta a, an khungna lah team ṭha Atletico an ni.

A hmuhnawm

First half-ah chance sawi tur a tam lo a, mahse, Barca-in goal an khung avangin boruak a ṭha. Second half-ah Catalan club hi an phur sawt a, mahse, a tir lama Robert Lewandowski leh Torres te chance neih chu Jan Oblak chuan a dansak. Gavi leh Raphinha te pawhin an hun ṭha neih an chhawr chuang lo.

Atletico hian chance nei lo an ni bik lo. Mahse, Rodrigo de Paul leh Griezmann ten an chance neih an chhawr loh chhunzawm a, Atletico-in goal khung an harsat.

Barca vanneihna

Catalan club tan match thum zet goal khung lo tawh Lewandowski-a'n goal khung a châk lutuk hret a, awlsam taka Raphinha tana siamsak turah a shot a, a goal lo - Polish striker hian goal ruak hmaa ding Raphinha kha pe zeuh se, Barca hi 2-0 in an chak ang.

Hetihlai hian hun pek belhah Busquets chu penalty box-ah chiang takin a handball a, penalty ngei tur niin lang mah se referee-in penalty spot a kawk tlat lo a, Catalan club an vannei takzet.