Alonso kaihhruai Leverkusen an chak

Bayer Leverkusen-in Europa League semifinal an lut a, Pathianni zan khan Xabi Alonso hote hian Bundesliga-ah an chunga awm RB Leipzig chu 2-0 in an hneh leh bawk.

BayArena-a inkhelah Adam Hlozek hmangin minute 40-naah Leverkusen-in hma an hruai a, Leipzig player pawimawh Dominik Szoboszlai chaun minute 85-naah hnawhchhuah a nih bakah penalty a chawi. Nadiem Amiri-a'n penalty hi petin Leverkusen chak nemghehna goal a khung.

Bundesliga-ah match nga chauh khelh tur a awm tawh a, Borussia Dortmund (60 pts) leh Bayern Munich (59) ten nomawi an inchuh. Chutihrualin UCL khelh tum inum boruak pawh a sang a, Leverkusen hi paruknaah awmin point 47 an hmu a, palinaa awm SC Freiburg an phak lohna chu point ruk chauh a ni.