Harh tharna chang West Ham

Season tir lamah West Ham an che fuh tawk lo - Premier League aṭanga tlak hlauhthawnawmah te an awm hman. Mahse, David Moyes-a naute an harh thar a, tunah chuan 13-naah an awm leh ta.

Pathianni zan EPL inkhelah Hammers hian Bournemouth chu 4-0 in an sawi. Michael Antonio, Lucas Paqueta, captain Declan Rice leh substitute Pablo Fornals te chuan goal khat ṭheuh an khung.

West Ham hian Arsenal laka an si phurh an sut zo thei a, chumi hnuah Gent hnehin Europa Conference League-ah semifinal an lut, tunah Bournemouth an sawp - Nilaini zanah Liverpool an mikhual dawn a ni.

Hammers manager Moyes chuan, "Kan tan chuan chawlhkar duhawm tak a ni, inkhel hmuhnawm taka goal li ngawt kan khung thei kha ka lawm. Season bul kan ṭan fuh lo tih chu kan hria, a hmawr erawh kan bawk fuh ka beisei hle," a ti.

Chak lo Bournemouth erawh 15-naah awm mah se, tla thei china awm Everton aia an sanna chu point nga chauh a ni a, khelh hmabak match ruk an la neih avangin an dinhmun a la him lo.

Bournemouth manager Gary O'Neil chuan, "West Ham lam min beihna kha kan tuar thei lo a ni, box chhungah an hlauhawm em em a, a bakah counter attack kha kan veng thei lo," tiin an chak lohna lai a hmu fuh a, siamṭhat ngei a tum.