Barcelona Open champion Alcaraz

Carlos Alcaraz chuan Stefanos Tsitsipas hnehin Barcelona Open nomawi a kawl lai a humhim, a kum zawnin a champion. Pathianni zan final inkhelah Spanish rawlthar hian world number 5 hi 6-3, 6-4 in a hneh.

US Open champion Alcaraz hi hliam nei loa a inkhelh chuan midang tan hmachhawn a hautak thei hle. Greek tlangval hneh tur pawh hian darkar khat leh minute 19 bak hun a mamawh lo hial a ni.

Tsitsipas nen vawi li an intawn tawhah Alcaraz hi a la chak vek. Roger Federer, Rafael Nadal leh Novak Djokovic te liam fel hnuah Grand Slam beiseina nei sang Tsitsipas tan chuan Alacaraz rawn chawr chhuak leh ta hi thil lawmawm a ni hran lo ang.

Kum 19 mi Alcaraz chuan, "Kan chhungte, ṭhiante leh min ṭan em emtute hmaa Barcelona Open nomawi chawi zet hi chu a hluin a lawmawm. Ka team member zinga ṭhenkhat te chenna hmun a nih bawk a vangin a hlu zual," a ti.

Alcaraz hi Spanish mi a ni a, tennis court hrang hrang zingah clay court hi a inkhelh thiam zualna bik a ni. Spanish legend Nadal nen an khaikhin der tawh a, world number 1 ni thei naupang ber a lo nih tawh bawk avangin an khaikhin hi a mak hran lo.

World number 2 Alacraz chuan, "Mi ṭhenkhatin Rafa nen min khaikhin tih ka hria, ka tan chuan thil lawmawm tak a ni. Chutihrualin tu emaw thlaktu emaw, tu emaw aiawhtu nih ka duh lo, kei chu Alcaraz ka ni.

"Tun hnaiah Rafa a inkhel thei lo a, ka tan champion theihna kawng a inhawn phah ve mai chauh zawk a ni," a ti. Alacaraz hi hliam nei loa a inkhel tluang thei a nih chuan Novak Djokovic tan tan world number 1 dinhmun chuh buai thei ber a ni ang.