Napoli tan ban phak maiah Serie A nomawi!

Tunah chuan a hnai takzet ta, a kut khing hnihin an khawih tawh a, chawi kang turin tha an pek det hunah an la tawh mai dawn a ni. Napoli chu Serie A champion an ni dawn, an tan chuan Italian football inelna sang bera champion hi thil hlu bik a ni ngei ang.

Napoli hian an match lehpekah Salernitana an hneh a, inkhel dangah Lazio chuan Inter Milan lakah point thum an hmuh phak loh chuan Luciano Spalletti naute an champion fel tawh dawn, hnai vet vet tawh tak a ni.

Pathianni zan Serie A inkhelah Napoli hian Juventus 1-0 in an hneh, goal awmchhun hi Giacomo Raspadori-a'n hun tawp ruala a khung a ni. Naples club hian anmahni hnaih bertu Lazio aiin point 17 zetin an hmu hnem zawk.

Dioego Maradona hunlai an champion bak an la champion leh lo a, an dinhmun ṭha viau tawh mah se coach Spalletti erawh a la ṭawng fimkhur hle. Spalletti chuan, "Kan champion tih nemngheh a nih hma chuan kan nghak rih lawk tur a ni ang.

"A chhan chu hna hlenchhuah tur kan la nei," tiin hna a la zo lo tih a sawi. Spalletti hian Zenit Saint Petersburg chu 2010 leh 2012 khan a lo champion pui tawh, a hnuah tun season hi league nomawi a chawi lehna hmasa ber a ni dawn.

Inkhel dangah AC Milan chuan Rafael Leao-a goal hnih hmangin Lecce 2-0 in an hneh a, a sang zual pali zinga tel phak turin an dinhmun an siamṭha zel - an chunga awm Roma nen an point a inzat reng, match khatin an khel hnem thung.

Milan hian Champions League semifinal an lut tawh bawk a, league aṭanga UCL an khel phak lo a nih pawhin a champion chuan an tan kawng a inhawng dawn tho; Inter Milan nen final luh an inchuh dawn a ni.

Pathianni tlai Serie A inkhelah Inter pawh hian Romelu Lukaku goal hnih leh Lautaro Martinez goal khat hmangin Empoli 3-0 in an hneh - league lamah chuan Inter hi Milan hnuaiah an awm. Mahse, UCL bakah Coppa Italia semifinal khelh tur an la nei bawk.