Tu nge tun season-ah Premier League top scorer ni ang?

Premier League hi an khel zo emaw khelh chunzawm loin tawp ta pawh ni se hmahruai mektu Liverpool chu champion atan an puan ngei a rinawm. Chutihrualin Golden Boot dawng tur hi engtin nge thutlukna an siam ang le, inelna neih china goal khung tam ber a nih chuan goal 19 khung tawhtu Jamie Vardy chu top scorer a ni thei ang.

Chutihrualin inelna hi an neih chhunzawm a nih erawh chuan top scorer tur a chiang lo. Season hnih chhung a zawna top scorer ni tawh Mohamed Salah-a'n goal 16 a khung tawh a, Liverpool-in match kua khelh tur an la neih bawk avangin a dam ṭha a ni chuan dah bo a rem lo.

Chutiang bawkin season liam ta a Salah nena joint top scorer Sadio Mané (goal 14) leh Pierre-Emerick Aubameyang (goal 17) te pawh an hming an rawn lang nawlh thei a, Manchester City striker Sergio Aguero pawhin goal 16 a khung tawh tih a hriat a ṭha bawk.

Premier League-a Leicester City champion pui tawhtu Jamie Vardy hi pressure sanga buai tur a ni tawh lo. Kum 33 mi English striker hi tun season-ah minute 2224 a inlan tawh a, goal 19 khung tawhin minute 117 danah goal khat zel khung ang a ni.

Vardy hian Premier League a khelh hmasak berin 2014-15 season khan goal 5 chiah a khung a, hemi hnu hian goal 10 a khung tling vek. Foxes-in Premier League nomawi an chawi ṭumah goal 24 a khung a, a goal khung zat hian a theihna a pholang.

Tun season-ah Vardy-a'n bul a ṭan ṭha a; October, Novermber leh December-ah te chuan inkhelh apiangah goal a khung tih tur a ni a, amaherawhchu kum 2020 a hmang ṭha lo. Chutihrualin Covid-19 vanga an chawlh hma match hnuhnung berah Aston Villa lakah goal hnih a khung a, thla hnih aia tam chawlh hnuah a chhunzawm thei a nih chuan Golden Boot dawng turin a dinhmun a ṭha ber.

Pierre-Emerick Aubameyang hi Arsenal-in goal a khung theih loh avangin Borussia Dortmund aṭangin an lalut a, Bundesliga-a goal khung theih avanga hming a chher hnuah Premier League-ah a chhunzawm zel. Auba hian tun season-ah goal 17 a khung tawh a, minute 2305 inlan tawhin minute 136 dana goal khat khung zel ang a ni.

Gabon striker hian Mikel Arteta hnuaiah captain armband hreng mah se hmatawng berah dah a ni lo a, mual sir lam aṭanga nawrtu atan an hmang. Heti chung hian Auba hian goal khung a ṭhulh lo a, a khat mawi tawkin goal a khung ve reng a. Arsenal-ah hmun pawimawh a chan avangin goal khung belh ngei turin a beisei theih ang.

Sergio Aguero leh Mohamed Salah ten goal 16 ve ve an khung tawh a, an la khung belh zel dawn. Manchester City striker hian minute 1401 khelin minute 88 danah a pet goal a, Liverpool forward hian minute 2246 khelin minute 140 danah a khung.

Salah hi minute a hman tam zawk vangin dah hniam theih a ni lo - assists vawi ruk a nei tawh tlat. Egyptian Messi an tih mai Salah hian season hnuhnung pahnihah Premier League Golden Boot a dawng a, tun season-ah a dawng ta lo a nih pawhin thil mak bik a thleng a nih loh chuan Golden Boot aia pawimawh zawk Premier League nomawi a chawi dawn.

Aguero chanchin sawi nawn a ngai tawh lo a, commentator ropui Martin Tyler-a'n 'Aguerooooo' a tih ṭum kha football ngainatute bengah a la cham reng ang. Kha thu khan thu tam tak a sawi a, Aguero goal vang khan Manchester City-in Premier League nomawi hmasa ber an chawi a, Manchester United lakah ṭhenawm bengchheng satliah an nih ringawt loh zia nemnghetu a ni a, Aguero 'ṭhat zia' tifiahtu a ni bawk.

Liverpool kawr ha tawh Danny Ings-a'n Southampton tan hming a chher a, goal 15 a khung tawh. Top scorer tura beisei a harsa. 

Liverpool innghahna Sadio Mane-a'n goal 14 a khung a, Manchester United forward Marcus Rashford nen an khung zat a inang chiah. Mane leh Rashford hi an theihna thlirin goal 20 khung thei tur player an ni a, tun season-ah erawh a har deuh tawh maithei.

Wolves forward Raul Jimenez, Chelsea striker Tammy Abraham leh Everton forward Dominic Calvert-Lewin ten goal 13 ṭheuh an khung tawh a, theihna an nei sang hlawm hle.