Premier League dan a khauh dawn

Khawvela league ngaihven hlawh ber tih ngam Premier League club-te chuan nimin aṭang khan training an neih chhunzawm ve leh ta a, hetiang boruak karah hian thuneitute chuan engkim uluk taka kalpui a nih tur thu an sawi. 

Premier League chuan an hnuaia club-te chuan ruahmanna an siamte an zawm ngei a ni tih hriat nan club training an tlawh thut thut tur thu an sawi a, hei bakah hian GPS tracking leh video analysis-te chu club ho thlithlai nan hman tur a ni bawk. 

English top flight league-a director of football Richard Garlick chuan, "Zawi muangin kan hmachhawpte hi kan kalpui ang a, training ground tina inspector neih dan kan ngaihtuah ang. Chu chuan dan kan zamte zawm a nih leh nih loh chungchangah inrintawkna min pe dawn a ni," a ti. 

Premier League-ah hian Liverpool chu table chung berah awmin an hnuaia awm Manchester City aia an sanna chu point 25 a ni a, match kua chauh khelh tur awm tawhah Reds hian champion turin vawi hnih chak bak an mamawh lo. 

Hetiang boruak karah hian Premier League chief executive Richard Masters chuan champion team hnena nomawi hlanna hun chu hman ngei an tum thu a sawi a, champion chiang sa tia sawi ngam Reds hian entu awm loin an khelh ngai dawn mah se nomawi hlanna hun erawh hman a ni dawn tihna a ni. 

Richard Masters chuan, "Kan himna tur lamah buaina a awm a nih hran loh chuan nomawi hlanna hun hi siam ngei tum a ni," a ti a, Liverpool fan-ten an club nomawi chawi lai hmuh an châk chu an hmu ngei dawn niin a lang. 

Premier League hian an ruahmanna hmasa ang chuan June 12-ah league khelh chhunzawm leh an tum a, mahse hei hi chiang taka pawm erawh a ni lo. Masters chuan club-ten 'contact training' an neih hunah league khelh chhunzawm leh hun tur chu a chian theih chauh tur thu a sawi. 

Masters chuan, "June 12 hi ruahman chhinna chauh a la ni rih a, chiang taka pawm a la ni lo. Player-ten in tawk ngam chunga training (contact training) an neih hunah kan kal zel dan tur chu a chiang chho ang. Kan dinhmun a zira inthlak danglam zel kan thiam a ngai a ni," a ti. 

Player leh staff-te himna chungchang sawi zuiin Masters chuan, "Kan ruahmanna hi a him tawkah kan ngai a, player leh manager-te pawh kan ruahmanna a him tawk thu hi kan hrilh a ni," tiin a sawi. 

Europe-a football thuneitu sang ber UEFA chuan May 25 hmaa league khelh theih hun tur tichiang turin an hnuaia ram te chu an hriattir hlawm a, hei hi UEFA hnuaia inelna a bik takin Champions League leh Europa League kalpui dan tur an hriat theih nana an tih a ni. 

Mahse, UEFA hian May 27-a executive committee neih an tum chu June 17-ah an sawn hla a, Premier League an vanneih phah - UEFA executive committee hun sawn a nih takah chuan league khelh hun tur tichiang turin hun an nei tam sawt tihna a ni. 

European football-a league lian zingah Bundesliga chuan league an khel ṭan leh der tawh a, Bundesliga hian non-contact training an ṭan aṭanga kar ngana velah league an khel chhunzawm ngam chauh. Premier League hian June 16 emaw June 26 lam an thlir rin a ni.

Premier League club-ten training an neih hmasak berah hian group-ah an inṭhen ang a, group pakhatah mi panga aia tam awm a rem lo - player pakhat tan minute 75 bak training neih theih a ni lo bawk ang.  

Training neih zawh apiangin corner flag, ball, cone, goalpost leh khelmual thlengin damdawia kah vek zel an ni dawn a, kar tin vawi hnih tal player leh staff-te chu test neih a ni ang a, nitin training hmaain player-te tan questionnaire siam a ni ang a, khawsik leh sik loh en ziah a ni dawn bawk. 

Newcastle United manager Steve Bruce chuan, "Training-a kan kir huna kan tih tur hi a him theih dan ber tur a ni tawp," tiin an dinhmun a him thu a sawi a, Premier League hmalaknaah a lungawi. 

Premier League-in ruahmanna ṭha tak siam a, league khelh chhunzawm lam an hawi laiin Football Medicine and Performance Association (FMPA) zirchianna aṭanga a lan danin Premier League doctor leh physiotherapist zinga a zahve chuan rawn an hlawh tawk lo niah an inngai. 

English football league lama doctor leh physiotherapist 68% chuan rawn an hlawh tawk lo niah an inngai bawk a, training tura club-te kir leh chungchangah an chet dan tur leh an mawhphurhna tak hriatthiam a harsat thu an sawi - FMPA zirchiannaa zawhna chhangte hi doctor leh physio 138 an tling. 

Hetihlai hian Premier League thupuangtu chuan damdawi lam thiam an rawn reng thung sawiin, "Medical expert-te rawn reng chungin thutlukna hi siam a ni a, kan rawnte hi Premier League club doctor, Public Health England, sorkar leh infiamna khawvela medical lama hnathawkte an ni," tiin a sawi.