Zanin dar 12:30-ah Premier League Final : Manchester City khelmualah Arsenal
Sap fiamthu pakhatah chuan ti hian an ti, "Pep Guardiola hian Premier League a awp hneh lutuk a, amah el thei turin Mikel Arteta a chher chhuak a, chubakah chuan player pahnih a pe tel bawk," an ti, fiamthu ni mah se hei hian Premier League chanchin a phawk chhuak chiang viau.
Manchester City chuan zanin dar 12:30 hian Arsenal an lo mikhual dawn. Citizens manager Guardiola-a'n "Premier League Final" tiin a lo sawi tawh a, league-ah final awm lo mah se a thusawi tum a chiang, zanin hi champion tur chinfelna tia sawi theih a ni.
Final chu
Premier League hmahruaitu Arsenal hi an khelh hmabakah an chak vek chuan an champion dawn. Manchester City pawh an hmabaka an chak vek chuan an champion dawn, engkim hi an kutah a la innghat ve ve tihna a ni.
Pep Guardiola naute hi an champion leh a nih chuan, tun hnai season ruk chhunga vawi nga an champion-na tur a ni ang, hetiang bak baka English football awpbeh dan a awm leh thei tawh chuang lo ang.
City manager Pep Guardiola chuan, "England rama team ṭha ber nen kan inkhel dawn, tunah hian keini aiin point ngain an sang zawk. Tun hnaiah a zawnin match thum chu an khingpuite nen an inhnehtawk tih ka hria.
"Mahse, an chak zawh lohna inkhelah pawh khan an khel chhe lo. Hnehna kan chang thei a nih chuan kan tan thil a awlsam phah ang, kan kutah a innghat chhunzawm thei dawn a ni," a ti a, chak ngei chu a tum ruh viau.
Man City hian Premier League bakah Champions League leh FA Cup champion an la beisei mek. Spanish manager hian season khat chhunga nomawi lian tham pathum chawi a chak, chumi tihlawhtling turin fans lam a sawm.
Guardiola chuan, "EPL hi thla 11 chhung khelh a ni a, tuna kan dinhmun thleng tur pawh hian thil tam tak kan paltlang. Treble champion tur chuan fans an pawimawh. Tun ṭumah pawh hian inkhelh hma darkar thumah Etihad Stadium khat ngei se ka duh," a ti.
Final a ni lo
Arsenal manager Mikel Arteta a ṭawng fimkhur, tun ṭuma chak zawk hi champion tur tihna a la ni lo a ti ve thung. Arteta chuan, "Man City hneh ila kan champion tihna a la ni dawn lo, kan dinhmun erawh a ṭhat phah ngei ang.
"Etihad Stadium kan tlawh hnuah hian inkhel awlsam lo tak panga kan la hmabak tih hriat a ngai," a ti. Chelsea, Newcastle United leh Brighton an tum zui dawn a, an hmabak hi a awlsam dawn lo - City an hneh theih erawh chuan inrintawkna an neih belh dawn.
Tun hnai an boruak sawi zuiin Arteta chuan, "Kan khelh ṭhat leh chet fuh lai ber chu a ni lo. Siamṭhat mai theih erawh a la ni, goal tam zawk kan khung a ngai a, chumi rual chuan holam taka goal chhuah tihtlem a ngai thung," a ti.
Liverpool lakah goal hnih an hum zo lo a, West Ham lakah penalty hlahin an goal an venghim thei lo zui bawk. Southampton lakah chuan hun tawp dawnah goal hnih an sut zo hram, point khat an hmu a nih kha - City lakah chuan 'come back' kher ngai lo tura fimkhur a ngai ang.
Arteta chuan, "Man City hlauhawmna lai kan hria, kawng hrang hrangin min beih dan pawh an thiam. A bul ṭanna chu goalkeeper Ederson a ni, ani hi ball a chan chuan a hlauhawm ṭan nghal tih hriat a ngai, chuvangin engkima fimkhur a ngai dawn," a ti.
Man City hian keeper Ederson hi ball sem turin an hmang thiam a, tlarhnung aṭanga bul ṭanin an khingpui an bei ṭhin. Arsenal tan a hmasa ber aṭanga a hnung ber thlengin ven uluk an ngai dawn tihna a ni.
