Spurs-in manager 'nghet lo' an ban - engtin nge an chinfel dawn?

Premier League boruak a sosang tawlh tawlh a, a tuar bertu chu club enkawltu coach-te an ni - English top flight league-ah club 20 an awm a, coach 13-in ban an tawk ta!

Tottenham Hotspur chuan season tawp thleng atana coach lailawka an ruat Cristian Stellini an nghak hman tawh lo a, season tawp hmain Italian coach hi a hna aṭangin an chawlhtir!

Season thara Champions League khelh beisei Spurs hian Pathianni zan khan Newcastle United chu 6-1 ngawtin an ngam lo a, London club tan mualphona tawpkhawk a ni a, season thara European football khel lo thei dinhmunah an ding mek.

Spurs chairman leh neitu zinga mi Daniel Levy-a'n mawhpuh tur a zawng a, a tawpa tuartu chu coach a ni - Stellini hian match li bak Spurs a enkawl hman lo a, a thawhpui Ryan Mason chuan season tawp thleng London club hi a enkawl zui ang.

Tottenham hi table-ah pangana an ni mek a, palina Manchester United chu point rukin an phak lo mek - match hnihin an khel tam zawk thung. Ningani zan dar 12:45-ah team pahnih hi an intawng zui dawn a, Ryan Mason tan hna hautak a inchhawp nghal.

Hriatthiam a har

Tottenham-in season thara Champions League khel tura an elpui langsar chu Magpies an ni a, St. James' Park-a khati taka an mualpho kha club chairman Daniel Levy chuan a ngaithiam lo a, "Engti kawng maha ngaihzam theih a ni lo," a ti!

Levy chuan sawi zawmin, "Hmuh a hrehawm takzet a, khatiang thil a thlen chhan kha kawng hrang hrangin a sawi theih ang - kei mai ni lo, board, coach leh player ten mawh kan phur vek a, a mawhphurtu ber erawh keimah ka ni," a ti a, mahse, amah bang loin coach a ban thung.

Spurs hian Conte an ban hma khan Conte-a mît (gallbladder) zai a nih avangin Stellini hian Spurs a enkawl hman a, league match liah vawi thum hnehna chanpuiin, FA Cup fifth round-ah Championship club Sheffield United an ngam lo thung.

Hetihlaia hriat tur erawh Conte-a'n phone katlanga Stellini hi be reng chungin, thutlukna tam zawk chu a siam a la ni tho a, Conte awm loh kara an hlawhtlinna chu Stellini hnathawh ṭhat anga sawi bik a rem lo.

Lawm chunga thlahna

Spurs-in Magpies an ngam loh khan Stellini hian ngaihdam a dil nghal a, Italian coach hian, "Khatiang ang game pawimawh khel tura kan inbuatsaihna kha a ṭha tawk lo a ni. Squad ṭha tak kan nei a, mahse, vawiinah kha chuan team ṭha tak kan nihzia tumahin an pholang thei lo.

"Kan khelh dana thutlukna siamtu chu keimah ka ni a, hliam kan neih nual avangin khelh dan pawh kan thlak. Mawhphurhna chu ka la a, mahse, ka tisual a ni. Kan tihdan kan thlak kha chuan goal kan khung a, theihtawp kan chhuah bawk. A tir lam minute 25 kan tichhe em em mai kha ka hrethiam lo," a ti.

Kum 48 mi Stellini-a'n huaisen takin mawhphurhna a la a, a tawpa a tawh erawh ban a ni. Levy chuan, "Kan season harsat lai takin mawhphurhna a la a, kan hun tawn harsa taka an hnathawh avangin Stellini leh a coaching staff te chungah lawmthu ka sawi a ni," a ti a, a thlah.

Stellini thlaktu tur Ryan Mason hian a lu ruh khi avangin February 2018 khan inkhelh a chawlhsan a, Tottenham Hotspur aṭanga inzir chhuak niin kum 31 mi chauh a la ni. Spurs-in José Mourinho an ban khan kum 29 mi lek niin manager lailawk a lo ni tawh a, tunah season tawp thleng atan Spurs a enkawl leh dawn ta.

Tu nge ni ang?

Conte-a'n thla 16 chauh a enkawl hman tihin Spurs nen an inṭhen a, a chhuah dawnah player leh club neitu zinga mi Levy chu na takin a sawisel - player-te chu mahni hmasialah a puh a, "Kum 20 chhung he club-ah hian a awm tawh a, eng nomawi mah an chawi lo," tiin Levy a sawi bawk.

Coach lailawk meuh pawhin ban a tawk a, hei hian Spurs dinhmun chhiatzia a hrilhfiah a, coach thar zawnna kawngah harsatna a thlen ang em, tih chu zawhna awm thei a ni bawk. Fans tam takin an la atchilh rawn Mauricio Pochettino lah Chelsea nen sawizawm a ni a, Spurs nen an inbe lo niin an sawi.

Bayern Munich ban tak Julian Nagelsmann hming pawh a ri nawn a, Barcelona boss hlui Luis Enrique an lam ri bawk. Coach pahnih hi Chelsea nena inrem thei lo an ni a, Spurs tan anni ang coach langsar hi engtia hmin tur chi nge ni ang, hriatthiam a harsa mai thei.

Leicester City ban tak Brendan Rodgers hi fans tam tak chuan lo lawm harsa an ti mai thei a, lam rik zingah Chelsea ban hnu Graham Potter an it lo lehzual ang - hmuhnawm taka Brighton & Hove Albion hruai theitu Roberto de Zerbi hian club lian boruak a zo ang em, tih chu zawhna chhan harsa tak a ni bawk.

Buaina chu

Spurs coach thar tan buaina chinfel tur tam tak a awm - Mourinho khan mawi lo taka Spurs chungchang sawiin a bansan a, Conte pawh a insum bik chuang lo. Thla 11 liam taa Spurs neituten squad thuam chak nana pound maktaduai 150 an thehchhuah lai kha chuan fan-te an hlim hle.

Mahse, £60mtd man Richarlison hian a man phu khawpin a la khel chhuak lo tih chu tlang hriat a ni a, langsar takin a lungawi lohna a la tilang zui! Brighton-a hmuhnawm em em midfielder Yves Bissouma hi £25mtd man ni mah se Spurs-ah khelh ṭhat reng a la harsat rih.

Argentina defender Cristian Romero hi player class pangngai tak ni mah se, inthlahdah chang a nei hi buaina a tling. Son Heung-min-a'n kum 2025 thleng contract nei mah se, Asian player ropui bera tam takin an ngaih hian season tharah club thar a melh lo ang tih a sawi theih loh.

Manchester City laka an hralh phal tak loh Kane mawlh hi - kum 29 a ni ve tawh a, striker class tak ni siin nomawi chawi a la nei lo. Kum khat chiah contract nei tawh striker hian chhuah a tum ngein a rinawm a, Manchester United hming a langsar hle. Spurs chhungkua a buai a, tunah chuan a chinfelna tur an nei rih lo.