Hmelma kha ṭhian ṭha; Chelsea leh Poch an inrem dawn

Premier League club Chelsea leh Tottenham Hotspur inhal dan chu na tak a ni. Mahse, Spurs fan-ten an ngainat rawn Mauricio Pochettino chuan club pahnih inkar boruak zawng zawng theihnghilhin Stamford Bridge lam a hawi a, Blues nen an inrem dawn niin khawthlang media-te chuan an tarlang.

Todd Boehly leh a thawhpuiten Chelsea an lei hnua London club buaina inhrilh nawn a ngai lo - Thomas Tuchel an ban hnuah Graham Potter an lalut a, Potter an ban hnuah Frank Lampard chuan coach lailawk hna a chelh mek.

Mahse, Chelsea hian an ban hnu Lampard hnuaiah pawh result ṭha an nei hleithei lo - match li an khelh tawhah match li an tlawm a, zanin dar 12:15 hian Brentford chu league match khel turin an mikhual zui dawn.

Khawthlang media-ten an tarlan dan chuan Chelsea leh Poch hi an thawhdun ngei a rinawm a, mahse, thutlukna siam hmain an la inbiak chhunzawm dawn - ruahman angin Lampard hian season tawp thleng Blues a enkawl dawn nge, Poch hian a thlak nghal dawn, tih erawh zawhna awm mek a ni.

A tirah 'NO'

Tottenham boss hlui Pochettino hi Paris St-Germain chuan July 2022 khan a hna aṭangin a chawlhtir a, hemi hnu hian club enkawl a nei leh tawh lo - Spurs-a kir leh tur anga sawi a nih laiin Chelsea-in an bia.

Kum 51 mi coach hian a tirah chuan Chelsea sawmna hi a hnar a, Stamford Bridge a pan dawn a nih chuan thuneihna sang zawk neih a duh - squad enkawl ngawt piah lamah thutlukna lian zawk siam thei nih a duh.

Chelsea hian Poch-a duh ang hi an pawmsak nia sawi a ni a, khawthlang media ṭhenkhat chuan tuna Blues player zinga chhuahtir loh tur thlengin an sawi ho tawh niin an sawi - goal khungtu tur nei lo Chelsea fan-ten Harry Kane an lo mitthla mek a nih pawhin an demawm lo.

Blues hian tun hi Pochettino an dawrna hmasa ber a ni lo. January 2021-a Lampard an ban khan an lo dawr tawh a, mahse, Poch hian PSG a lo 'Yes' tawh avangin a hnar.Thomas Tuchel ban a nih khan an lo dawr tawh bawk a, mahse, Graham Potter kha an duh sa zawk hrim hrim nia sawi a ni.

Khawiah nge a dang?

Chelsea hi Bayern Munich boss hlui Julian Naglesmann nen pawh sawi zawm an ni. Club sporting director pahnih Laurence Stewart leh Paul Winstanley te chuan coach zawn hna hi an thawk a, Naglesmann hi an inbiakpui ngei.

German coach nen hian inbe leh tura tih ni mah se Nagelsmann hi a inhnukdawk a, khawthlang media ṭhenkhat chuan Chelsea hian Germany-ah chiah club a la enkawl avangin an ring tawk lo niin an sawi bawk - Bayern hma hian Hoffenheim leh RB Leipzig a enkawl.

Chelsea hian Luis Enrique pawh an dawr ngei a, mahse, kum 2017-a Barcelona a chhuahsan hnua club enkawl nei lo coach hi an tan a ṭha tawk loah an ngai. Hetihrual hian Spain coach hlui hi mahni thu duh tak, kalphung nghet nei a ni a, a neitu lam inrawlh thukna Blues pan hi a châk lo a ni ve thei bawk.

Premier League khel tura Burnley kaipuitu Vincent Kompany hming pawh lam rik a ni. Mahse, kum 37 mi hian an ram club Anderlecht leh Burnley-ah hna a thawk ṭha viau chungin pressure sang zawkah club a la enkawl lo a, hei hian Blues thuneitute ngaihtuahna a tibuai nia sawi a ni.

Tu nge Poch?

Pochettino hian kum nga chhung Spurs a enkawl a, kum 2014 aṭang khan kaihruai ṭanin, Champions League 2019-ah phei chuan final a hruai thleng hial. Mahse, November 2019 khan ban a ni.

Argentine coach hian Espanyol aṭanga a professional coaching career ṭanin, Spurs bakah Southampton leh PSG a lo enkawl tawh bawk a, PSG-ah hian Ligue 1 nomawi bakah Coupe de France leh Trophée des Champions nomawi a chawi.

Spurs-ah nomawi chawi lo mah se kum 2015 khan League Cup final a khelhpui bawk a, 2016-17 season khan Premier League-ah pahnihna a nihpui bawk - an elpui club-te sum hman dan leh an budget khaikhinin, hna a thawk ṭha hle.

May 2016 khan Spurs hian khualmualah Chelsea chu 2-0 a hma an hruai hnuin 2-2 in an inhnehtawkpui a, nomawi chawi an beiseina chu Leicester City lakah an hloh - yellow card pakua ngawt Spurs player-ten an hmu a, hetihlaia Spurs coach erawh Chelsea boss a ni dawn ta!