James hoin Lakers an chak

LeBron James-a point 22 hmangin Los Angeles Lakers chuan Memphis Grizzlies chu 117-111 in an hneh. Nimin zinga an chak avangin Lakers hian best of seven series khelh turah 3-1 in hma an hruai fal ta.

Team pahnih an inkhel tawk hle, quarter lina an khelh zawh hnuah pawh an dinhmun a inang chiah. Over time khelh chhunzawm niin Lakers lamin point 17 an neih belh - Grizzlies erawhin point sarih chauh an neih belh thung.

April 27, Ningani zing dar 5:00-ah game 5 an khelh chhunzawm dawn. Lakers tan conference semifinal lut turin vawi khat chak a tawk. Mahse, an inkhelhna tur hi FedExForum a nih avangin mikhual team tan inkhelh a harsa ṭhin.

Inkhel dangah Miami Heat chuan Milwaukee Bucks 119-114 in an hneh. Heat hian series-ah 3-1 in hma an hruai fal ve ta bawk a, tlang tur pawhin an dinhmun a ṭha ta hle - hnehna an chan theih nan Jimmy Butler chuan point 56 tehmeuh a nei.

Butler hi NBA playoff chinah match khata point nei hnem pangana a ni phak hial. NBA All Star zinga vawi ruk tel tawh Butler chuan, "Point 56 kha a langsar a ni mai thei, a thawk chhuaktu chu keimah chauh ni loin kan team a ni zawk," a ti.