Coppa Italia semifinal-ah Inter vs Juve

Zanin dar 12:30 hian Coppa Italia semifinal second leg-ah Inter Milan leh Juventus te an inkhel dawn a, an inkhelhna tur hmun hi San Siro a ni. Final-ah zanina chak zawk tur hi rinkai an ni dawn a, semifinal hnuhnung zawk hi April 27, Ningani zana khelh tur niin Fiorentina leh Cremonese te an inhmachhawn ang.

Red card pathum

First leg-ah team pahnih hi 1-1 in an inhnehtawk a, Turin-ah inkhel boruak a sang. Juan Cuadrado hmangin Juve-in hma an hruai a, injury time-ah Romelu Lukaku penalty hmangin Inter-in an sut.

Lukaku hi a goal khung lawm dan vangin yellow card vawi hnihna hmuin hnawhchhuah a ni a, hun tawp hnuah Inter keeper Samir Handanovic leh Juve forward Cuadrado te chu an inbakkaih deuh avangin hnawhchhuah an ni ve ve bawk.

Inter an ṭha

Inter Milan hi hian 2020-21 season khan Antonio Conte hoin Serie A nomawi an chawi a, season liam ta khan Simone Ingzaghi hoin nomawi hunhim thei lo mah se Coppa Italia leh Supercoppa Italiana-ah an champion.

Tun season-ah league bikah an che ṭha lo a, parukna an ni mek. Chutihrualin Europe-a inelna sang ber Champions League-ah semifinal an lut a, Simone Inzaghi hote tan UCL bakah Coppa Italia a la champion theih tihna a ni.

Champion lai Inter hian Coppa Italia-ah last 16 aṭangin an khel ṭan a, semifinal lut turin Parma (2-1) leh Atalanta (1-0) te chauh an la hneh. Semifinal first leg chhiar telin Inter hian match thum chauh an la khel a, match thumah goal li chauh an la khung.

Coppa Italia bika Inter tan goal khung tam bik an awm lo a; striker pahnih Romelu Lukaku leh Lautaro Martínez bakah defender pahnih Matteo Darmian leh Francesco Acerbi ten goal khat ṭheuh an khung.

Tun season inelna pumpui thlir erawh chuan Lautaro Martínez (19), Edin Dzeko (11), Romelu Lukaku (9) leh Nicolò Barella (8) te chu goal khung tam an ni. Inter tana chanchin lawmawm chu Lukaku hremna an hlihsak a, Juventus a hmachhawn thei dawn.

Juve ve thung

Juventus hi tun hnaiah tla hniam deuh mah se tun season-ah an che chhe lo. Turin club hian Europa League-ah semifinal an lut a, Inter ang thoin inelna pahniha champion thei an la ni.

Serie A lamah Juve hi hrem vangin point an paihsak a, hremna an hlihsak leh si avangin league-ah pawh pathumnaah an awm mek. A tawi zawng chuan Juve hi Inter chungah an awm.

Juve hian semifinal thleng turin Monza leh Lazio an hneh a, semifinal first leg nen Inter ang thoin goal li an khung. Turin club hian tlarhmaah Dusan Vlahovic, Arkadiusz Milik leh Ángel Di María te an nei a, midfield aṭanga chawm turin Adrien Rabiot leh Manuel Locatelli te a enkawl.

Max Allegri hian midfield-ah talent nei ṭha Paul Pogba pawh a kawl a, ani erawh a damchian theih meuh loh avangin a inlan a rinawm lo zawk. Eng pawh chu ni se, Italian club lian pahnih Coppa Italia semifinal-a an inkhel tur hi a hmuhnawm ang.