UEFA-in European football season hman zawh a duh

20th May, 2020

Europe-a football thuneitu sang ber UEFA chuan European football season hman zawh ngei an duh thu an sawi a, UEFA president Aleksander Cerefin chuan August-a European season hman zawh hman ngei a nih theih nan ruahmanna an neih thu a sawi a ni.

Cerefin chuan, "Tuna kan dinhmun thlir hian European season kan hman zawh theih ngei ka beisei a, chumi awmzia chu UEFA hnuaia inelna pawh neih zawh theih a beiseiawm tihna a ni," a ti a, entu awm loin league chu khelh ngai mah se league tam zawkin season an hman zawh theih a beisei thu a sawi tel.

European football-a league langsar zual zingah Ligue 1 chu tihtawp a ni tawh a, Paris St-Germain chu champion-ah puan a ni. May 16 aṭang khan Bundesliga chu khelh ṭan a ni leh tawh a, La Liga chuan training an neih leh tawh avangin June-ah league khelh chhunzawm theih an beisei bawk.

Cerefin chuan, "Season hmang zo loa titawpte chuan season tharah UEFA inelna hmachhawn an duh a nih chuan qualifier an khelh leh tho a ngai dawn. Champions League leh Europa League khel tur chuan infiamna lama an chet dan bawk en a ngai a ni," a ti.

UEFA hnuaia inelna ngaihven hlawh Euro 2020 chu June 12 aṭanga July 12-a neih tura tih ni mah se Covid-19 vangin June 11 - July 11, 2021 atan sawn a ni tawh a, Euro hi ṭum dang ang lo takin Europe-a ram hrang hranga khelh kual tura ruahman a ni.

Ruahman dan chuan semifinal leh final chu London khawpuia Wembley Stadium-a thlen tura tih a ni a, Amsterdam, Baku, Bilbao, Bucharest, Budapest, Copenhagen, Dublin, Glasgow, Munich, Rome leh St Petersburg khawpuite pawh inelna thleng tur zingah an tel.

Cerefin chuan, "Inelna thleng tura ruahman sa khawpuiah te tho inelna hi neih tum a ni a, inelna thleng tur zinga khawpui pakua nen chuan titi hona kan nei tawh. Hetihlai hian thleng tura tihsa khawpui 12 aṭangin khawpui pathumin harsatna an nei a, kan sawi chhunzawm zel ang.

"Khawpui 12 kherah hian a rem ta lo a nih pawhin 10, 9 emaw pariatah pawh inelna hi kan nei mai ang," tiin khawpui pathumin harsatna an neih chu an tan buaina a nih loh thu a sawi.