Hmasawn kan la mamawh - Jurgen Klopp

Season hmang chhe tak Liverpool-in an league match hnuhnung pahnihah hnehna an chang a, a zawna vawi hnih chak ringawt pawh hi hahipa sawi tham a ni - ṭhenkhat chuan an theihnghilh tawh Champions League thlengin an sawi ri leh tawh.

Mahse, coach Jurgen Klopp erawh a fimkhur a, German coach chuan hmabak tam tak an la neih thu a sawi. Klopp chuan, "Kan theihna tak tak kan pholan zel a la ngai a, match hnih chauh a zawna kan la chak avangin thil thui tak sawi theih a la ni lo.

"Kan match hnuhnung ber kha thlir ila, kan khingpuiten 'throw-in' an neihin kan la talbuai tlat. Hmasawn kan la mamawh a, hmalam kan pan zel a ṭul. Kan match hnuhnung pahnih leh Arsenal laka second half kan khelh danah khan lawmna tur tam tak a awm - a nih tur angin bul kan ṭan a, a nih tur angin a tawp kan khar a ni," a ti.

Liverpool hian Arsenal 2-2 a an inhnehtawkpui hnuah Leeds United chu 6-1 in an sawp a, a hnuah Nottingham Forest chu 3-2 in an hneh leh bawk - zanin dar 12:15-ah hian West Ham an lenchilh ang.

Reds hi Premier League table-ah pasarihna an ni mek a, palina Manchester United chu point kuain an la phak lo mek - match khatin an khel tam zawk bawk a, season thara Champions League khel turin kawng a la thui hle.

Hetihlaia Liverpool lawmna pakhat chu Diogo Jota a lo kir leh ta hi a ni - Portuguese forward hian a league match hnuhnung pahnihah goal li a khung a, Liverpool tan a ṭangkaizia a pholang leh tawh.

Klopp chuan, "Tun season-a Diogo hliam tawrh kha a na em a, kha vang khan insiamrem turin hun a mamawh ve mai a ni. A fit ṭhat phawt chuan player ṭha tak a ni," a ti a, a striker chu a dam ṭhat leh tak thu a sawi.

Hetihlai hian season tawpa Liverpool chhuahsan tur Roberto Firmino a la dam chiang lo a, midfielder Naby Keita chuan dam lam pan mah se Hammers laka bul a ṭan erawh a rinawm chiah lo.

West Ham hi table-ah 13-na an ni mek a, mahse, relegation zone-a awm chin Everton aia an sanna chu point ruk chauh a ni a, tla thei dinhmunah an ding mek. Hei vang hian coach David Moyes dinhmun chu a derthawng nia sawi a ni.

Klopp chuan, "Club dang chanchin hi ka ngaihtuah vak lo a, mahse, West Ham hian David Moyes an ban a nih chuan Premier League-a manager upa ber ka ni dawn asin! Chutiang chu thleng lo se ka ti a, David hi cham hram rawh se," a ti!

United boss hlui Moyes hi kum 60 mi a nih laiin Klopp erawh kum 55 a ni. Hetihlai hian Klopp hian Crystal Palace boss Roy Hodgson a theihnghilh niin a lang - ani hi kum 75 mi a ni.

Klopp chuan Moyes chungchang sawi zuiin, "Kum sarih zet chu kan inhre ta. Hna ṭha tak a thawk a ni - tunah pawh an quality tak tak kan hmu chho a, game harsa tak a nih ka ring," a ti - Hammers hian an match hnuhnung pahnihah goal riat khungin, goal khat chiah an chhuah.

Europa Conference League quarterfinal second leg-ah K.A.A. Gent chu 4-1 a sawpin, Premier League-ah 4-0 in Bournemouth an sawp zui a ni.