Champion a hlu dawn - Bellingham

Borussia Dortmund midfielder Jude Bellingham chuan Bundesliga-a a club hmangaih a champion pui a nih chuan a aia lawmna tur chuang a neih loh thu a sawi.

Kar liam ta khan champion lai Bayern Munich-in Mainz lakah point an hmu lo a, Dortmund erawhin Eintracht Frankfurt 4-0 in an sawp. Edin Terzic-a hote hi table chung berah an awm a, an khelh hmabaka an chak vek chuan an champion dawn.

Dortmund player pawimawh Bellingham chuan, "Tun season chu thil a inthlak danglam nasa. Champion thei tura beiseiawm kan ni a, a chang leh Bayern an champion chiang. Tunah erawh champion thei kan ni leh tawh. A pawimawh ber chu ze nghet neih a ngai a, phur chiam leh hrehawm tih chiam a hun lo," tiin thil thlen dan a sawi.

English midfielder Bellingham chuan sawi chhunzawmin, "Kan team zingah match 29 khelh zawha hma kan hruai ring an awm lo ang. Tunah erawh hmahruaitu kan ni a, match 34 zawha a chung bera awm kan duh. Thil dang zawng zawng aiin Dortmund champion pui hi ka duh a, chumi a thlen theih nan chuan kan theihna zawng zawng kan hlan ang," tiin a sawi.

Dortmund hian VfL Bochum, Wolsburg, Borussia Monchengladbach, Augsburg leh Mainz te an la hmachhawn dawn a, tun dinhmuna a sang paruka awm chin an hmachhawn dawn tawh lo. An elpui leh champion lai Bayern Munich-in Hertha, Werder Bremen, Schalke, RB Leipzig leh FC Cologne te a la hmachhawn ve bawk dawn.