McGregor-a'n Mayweather hneh theih a inring

Boxer rothap Mike Tyson-a'n Conor McGregor-a fak zauh hnuah Irish fighter a pawr thar a, McGregor chuan American boxer ropui Floyd Mayweather chu ring chhungah a hmachhawn leh a nih chuan a hneh ngei tawh tur thu a sawi!

Tyson hian a podcast 'host' ṭhin 'Hotboxin’ with Mike Tyson'-ah UFC heavyweight fighter Francis Ngannou chu a titi pui a, he inkawmnaah hian Tyson chuan McGregor hi fakin, "Tun hnai kum 100 chhunga boxer ropui ber chu boxing khel ngai miah lo nichungin a hmachhawn a, round 10-a thlenpui thei a ni," a ti. 

Khawvela pa kawlhrawng ber ti hiala an sawi Tyson-a fakna hian McGregor-a beng a thleng vat a, UFC fighter chanchin ngah tak hian ngawihbo san mai mai a tum lo. 

McGregor chuan, "Mike, i chungah ka lawm e. Rematch hi kan nei leh ngei dawn a, Floyd-a khelh dan engkim ka hriatchian tawh avangin hnehna ka chang ngei dawn bawk a ni," tiin a sawi a, American boxer ropui hneh theih a inring hle. 

Mayweather leh McGregor hi kum 2017 khan a vawi khat nan an inhmachhawn a, boxing khawvela sum luh tamna ber inhnekah hian McGregor hi round 10-naah a tlawm a ni. 

McGregor a hneh hnuah hian Mayweather hian boxing ring a lut leh tawh lo a, luh leh tumna pawh a neih tawh loh thu a sawi. Hetihrual hian McGregor tan erawh kawng a hawn reng thu a sawi thung. 

Mayweather chuan, "Boxer pangngai chu ka hmachhawn dawn tawh lo. Kei chuan midang tih hlimna leh sum hi ka ngaihven chu a ni a, sum tam tak siam theihna a nih chuan McGregor hmachhawn hi ka pawiti lo," a ti - McGregor vs Mayweather hi a vawi hnih nan kan hmu leh a nih pawhin a mak lo ang.