Hero Super Cup: Mizo tamna Odisha an champion

Indian Super League club zinga Mizoram player kawl hnem ber Odisha FC chuan Hero Super Cup nomawi an chawi - Thawhlehni zan khan final-ah Bengaluru FC chu 2-1 in an hneh a, Mizo tlangvalten champion medal nen Kerala an chhuahsan.

Odisha tan Diego Mauricio chuan goal hnih khungin, Bengaluru tan Sunil Chhetri chuan goal khat thawh ve mah se awmzia a nei phak lo a, Odisha-in 2-1 a hnehna changin champion nomawi an chawi.

Juggernauts (Odisha sawina) ah hian Mizo keeper Lalthuammawia Ralte, defender Lalruatthara, midfielder Isaac Vanmalsawma & Paul Ramfangzauva, forward Jerry Mawihmingthanga leh Isak Vanlalruatfela te an awm a, an champion hi Mizoram tan a hlu hle.

Odisha tan an club chanchina nomawi an chawi hmasak ber a nih avangin a hlu lehzual a, Odisha boss, India international hlui Clifford Miranda chuan, "Ka hlim takzet a, ka lawmna hi thuin ka sawifiah thiam lo - Odisha tana nomawi hmasa ber a ni a, a dang tam tak kan chawi zel ka beisei," a ti.

GSS a chesual

EMS Corporation Stadium, Kozhikode-a inkhelah Odisha-in inkhel an thunun zawk a, goal pawh an khung hma zawk - minute 23-naah Odisha-in freekick an hmu a, a pet turin Diego Mauricio a lo pen chhuak.

Flamengo forward hlui hian naran takin freekick a pet a, Bengaluru goalkeeper Gurpreet Singh Sandhu chuan awlsam taka lo dan tum mah se a man nghet tawk lo a, Odisha-in hmahruaina goal an khung.

Goal an chhuah hnu lawkah Bengaluru-in si phurh sutna remchang nei mah se Chhetri chuan an hun ṭha neih hi a chhawr lo a, minute 38-naah Diego Mauricio bawk kan hmu nawn.

Mizo forward Jerry Mawia chuan Diego Mauricio ke bulah tak ball a tauh thla a, Brazilian striker tan goal-a chantir loh mawi lo khawpa chance duhawm a ni - a pet goal a, 2-0 a ni der.

A hmuhnawm

Goal dang lut loin chawlhlawk hman a ni a, team pahnih khelh dan thlir telin Odisha hi awlsam takin an chak mai dawn niin a lang. Mahse, Mizo tamna team an vannei tawk lo a, an chance neih goal-ah an chantir thei lo.

Chanmari tlangval Jerry-a'n chance duhawm a neih pawh goal-ah a chantir thei lo a, uiawm takin crossbar a pet per - Nandha Kumar-a'n vawi hnih ngawt a hlah pawh uiawm a tling a, Mauricio lah first half angin a ke a hmui tawk lo niin a lang.

Hun tawp hnaih lamah Bengaluru-in hun ṭha an nei ve ta nge nge a, Aniket Jadhav chuan ṭul lo takin Sivasakthi Narayanan a titlu a, Tamil Nadu tlangval hi uar taka a tluk bawk avangin referee-in penalty spot a kawk.

Bengaluru tan Sunil Chhetri chuan harsatna nei loin penalty hi goal-ah a chantir a, mahse, goal an khung hian minute 85 a ni tawh a, South Indian club tan tho leh turin hun a tam tawk tawh lo.

Beisei aia sang

Odisha star player Jerry Mawihmingthanga chuan, "Han champion meuh chuan a dan a dang khawp mai. Beiseina nei ve reng, mahse, rilru taka beisei ngam si loin inelna kan hmachhawn a, rin ai takin kan che ṭha a ni," tiin Vanglaini a hrilh.

FPAI Young Player of the Year-ah pawh thlan lo ni tawh Jerry-a khel a hmuhnawm a, Chanmari tlangval hi match dangah pawh a team tan a ṭangkai ṭhin hle - match nga an khelhah bul a ṭan vek.

Jerry chuan, "Ka chance neih chhawr loh a uiawm a, goal khung ngat ila, a nuam lehzual ang chu. A pawimawh ber erawh team anga kan champion kha a ni a, team kan champion hi a hlu ber a ni," tiin Vanglaini a hrilh.

Super Cup final-ah hian Jerry-a'n bul a ṭan bakah Isak-a leh Paul-a te chu bench aṭanga luhtir an ni. Odisha hian Inrinniah AFC Cup playoff an khel nghal dawn a, Super Cup champion an nih avangin Hero I-League champions Gokulam Kerala FC nen AFC Cup-a India aiawh nih an inchuh ang.