Spurs player-ten fans ticket an kir

Tottenham Hotspur player-te chuan Newcastle United laka 6-1 a an tlawm ṭuma a hmuna inkhel entu an fan-te chu ticket man an kir a, thuchhuah inṭawm siamin, "Kan squad chuan inlawm lohna leh thinrimna te hi kan hrethiam em em a ni," an ti a, ngaihdam an dil.

Spurs hian Pathianni zan khan Newcastle United chu 6-1 ngawtin an ngam lo a, Champions League khel tura an elpui team laka an tlawmna hian fan-te a tilawm lo hle. Season tawp thleng coach lailawk tura ruat Cristian Stellini chuan ban a tawh phah hial.

Tottenham player-te chuan, "Kan khel ṭha tawk lo. Hetiang ang hun harsaah chuan ṭawngkam mai hi a tawk zo lo tih kan hria a, hetianga tlawm hi chu a na duh bik a ni," an ti a, ticket man an kir.

St James' Park-a inkhelah khan Newcastle hi ticket 3,209 pek an ni a, ticket man hi £19 (Rs. 1,938) - £30 (Rs. 3,060) inkar niin, Spurs-in ticket man aṭanga a vaia an hmuh hi £80,000 (Rs. 81,60,400) vel nia chhut a ni a, mahse, player-ten fan-te chu pawisa hi an kir leh vek a ni.

Spurs chuan thuchhuah siamin, ticket man pek kir chu darkar 24 chhungin fan-te bank account-ah a luh kim hman an beisei thu an sawi.

Tottenham player-te chuan, "Kan khelmual leh khualmual thlenga min thlawpnaah lawmthu kan sawi a, hei hi rilrua awm reng chungin fan-te chu St James' Park-a inkhel en man ticket kir hi kan duh a ni," an ti a, an inthiam lo hle.