Championship-ah Burnley an champion

Vincent Kompany kaihhruai Burnley chuan Thawhlehni zan khan Blackburn Rovers khelmual Ewood Park an luhchhuah a, Manuel Benson-a goal hmangin 1-0 in hnehna an chang. Clarets hian match hnih khelh hmabak la nei chungin Championship champion an nemnghet.

Burnley hian April 7 khan season thara Premier League an khelh tur an tichiang a, Kompany hnuaiah inelna an thunun hle. Chutihrualin Clarets leh Blackburn inkhel hi east Lancashire derby a ni a, a boruak a sang.

Blackburn hian playoff khelh beiseina an la nei a, Burnley erawh nuam sain an khel thei tawh. Riversiders coach Jon Dahl Tomasson chuan, "Kan awmna hmun a inang lo. Chutihrualin tun ṭumah erawh team ṭha zawk kan ni a, goal ṭha bik an khung avangin an chak a ni," tiin an khelh ṭhat zawk thu a sawi.

Burnley champion puitu Vincent Kompany chuan, "Tun season-ah chawimawina pahnih lak theih a awm a, pakhat chu Premier League-a inpettling a ni a, pakhat leh chu champion a ni. Hei bakah hian tih tur pahnih a la awm a, chu chu derby-a chak niin a paliin kan tihlawhtling vek. Kan hlawhtlinna hi kan hre reng tawh ang," tiin a sawi a, an hmelma Blackburn khelmuala champion an nemnghet chu a hlut bik thu a sawi bawk.