Oriflame MFA Cup Semifinal: Melbuk vs Serchhip; Lawngtlai vs Khawzawl
Mizoram Football Association (MFA) hnuaia district hrang hrang inelna Oriflame MFA Cup 2023 chu vawiin hian semifinal khelh a ni dawn.
Inelna thlengtu Khawzawl Vengthar GSA leh Lawngtlai Vengpui te chawhnu dar 2:30-ah an inkhel ang.
Chawhma dar 11:00-ah semifinal match hmasa zawk khelh tur niin, team hmuhnawm TMFC, Melbuk leh FC Serchhip Kawnpui an intawng dawn, group match an khelh chhoh dan thlirin an inkhel hi a hmuhnawm dawn.
Melbuk Vs Serchhip
Serchhip district aiawhtu FC Serchhip Kawnpui hian an match hmasa berah Field Veng FC, Mamit chu 5-1 in an sawp, a hnu lamah erawh goal khung an harsat deuh - season hmasa anga semifinal-a tawp mai an duh lo a nih chuan goal an mamawh.
FCSK president Lalrempuia chuan, "Khua a lum em em a, tun hnaia khaw lum vangin player ṭhenkhat an damsam lo a, hliam kan nei deuh reng bawk. Amaherawhchu, theihtawp chhuahin semifinal an thleng tawh, final pawh thlen ngei kan tum ang," tiin Vanglaini a hrilh.
Champhai district chhungah tun hnaiah Melbuk el phak an awm meuh lo. TMFC, Melbuk hi Champhai first division champion an ni a, zone leh inter village lamah pawh Melbuk bawk hi an champion - Oriflame MFA Cup khelh hi an phu.
Vanglaini zawhna chhangin Melbuk manager Lawmsangzuala chuan, "Serchhip hi team ṭha tak an ni tih kan hria, mahse kan huphurh hran bik lo. Player ṭha fal tia sawi tur kan nei lo, mahse kan team hi a inbuk tawk em em a ni," a ti.
Mizo coach ṭha Lalsang-zuala Hmar kaihhruai an ni a, goal thum khung tawh Lalhmingthanga bakah winger Lalramchuana leh Zonunmawia te hi Serchhip lam tana ven uluk ngai tur an ni dawn - Serchhip lam an fimkhur viau a ngai dawn tihna a ni.
Lawngtlai vs Khawzawl
Mahni khelmual a nih hi chuan a boruak a danglam ṭhin - Khawzawl district aiawhtu Vengthar GSA pawh hi champion tura rinkai an ni. Mahse, semifinal-ah hian Aizawl FC tana khel tawh, an defender leh captain ni bawk Lalṭhakima an chhawr thei dawn lo. Ṭhakima bakah hian midfielder Lalfakzuala chu hrem vangin a inlan dawn lo bawk.
Coach PC Lalchhan-chhuaha (Lalnaua) chuan, "Match li aṭangin goal nga kan khung a, a la tam tawk lo. Tunah chuan nasa lehzual zawkin goal kan nawr dawn," tiin Vanglaini a hrilh.
Lalnaua hian team enkawl lamah tawnhriat a nei ṭha, tun hmain Luangmual FC a enkawl tawh a, Mizoram Premier League team RS Annexe a kaihhruai tawh bakah 2010 khan Mizoram team chu Dr T Ao Memorial football tournament-ah final a hruai thleng, player ṭha pahnih tel loa a zam lo hi a mak hran lo.
Lawngtlai DFA honorary vice president A. Vanlaltholeha chuan, "Lawngtlai Vengpui te kan district club zinga a ṭha an ni a, tun inelna atan hian coach ṭha tak hnuaiah inbuatsaihna pawh an nei ṭha," a ti. Group B hmahruaitu hian Group A pahnihna an huphurh lo ang.
April thla tira khelh zawh tak Mizoram Inter-District Junir Boys Football Championship-ah Lawngtlai district hi an champion, tunah chuan senior huangah Mizorama district zinga football thiam nih chhunzawm an tum ngam hi an inhmeh hle.