ISL-in kalphung ti danglam dawn

India rama football league sang ber Indian Super League chuan season thar aṭang chuan club tinin foreigner an neih theih zat chu a siksawi dawn niin phai lam media-te chuan an tarlang.  

ISL-ah hian club tinin ram pawn player pasarih a tam berah an nei thei a, a tlem berah paruk an neih a ngai bawk. Hei hi ISL chuan thlak danglamin a tam lam hi pasarih a la ni reng dawn a, neih tlem theih zat erawh pangaah tihhniam a ni. 

Hei mai hi a ni lo - ram pawn player zingah hian Asian player pakhat tal awm tura tih a ni a, club hian a tlem thei ber foreigner panga an nei a nih pawhin Asian player hi an kawl a ngai tho ang. 

Khelmuala ram pawn player inlan thei zat panga erawh a dan pangngaiin a kal reng dawn bawk. ISL hian tun hnaia All India Football Federation-in ram pawn player ti tlem tura ruahmanna a siam chu zawm turin inbuatsaihna an nei ṭan niin a lang. 

AIFF chuan ISL club-te hi 2021-22 season aṭang chuan ram pawn player kawl tlem turin a hriattir a, a tam berah ram pawn player pali kawl turin a ti - an zinga pakhat chu Asian player a nih a ngai thung dawn a, 3+1 an hmang dawn tihna a ni.