Man United hmachhawn tur Spurs 'hliam'

Tottenham Hotspur-in Newcastle United lakah goal ruk an chhuah a, Spurs hian zanin dar 12:45-ah Manchester United an mikhual dawn. Zanin Premier League inkhel tur hi palina inchuhna a tih theih a, Harry Kane hmalam hun hriltu a ni thei bawk.

Kane leh Goal

Spurs-in season an hmang ṭha tawk lo a, chutihrualin striker rinrawl Harry Kane erawhin season ṭha tak a hmang. England captain hian Premier League-ah goal 24 a khung tawh a, a tluk loh chu Erling Haaland chauh a ni.

Norwegian striker Haaland hian goal 32 a khung tawh a, hei hian Kane-a ropuina tur a dal. Chutihrualin Premier League hrechiangtu Alan Shearer chuan Kane hian Spurs chhuahsanin Man City-ah khel zawk se chuan Haaland-a khung ang zat vel tho hi a khung a ring.

Kane hian kum 2015 aṭang khan season tinin goal 20 a khung tling ziah a, match hnuhnung bera Newcastle laka goal ruk an chhuah ṭumah pawh goal a khung tho. English striker leh goal hi sawi zawm theih ni mah se nomawi nen sawi zawm theih a ni lo a, Kane hian nomawi lian tham a la chawi lo.

Tunah chuan Kane hi kum 29 a ni tawh a, Spurs-a a cham reng a nih chuan nomawi chawi lo thei dinhmunah a ding. Chutihrualin Man City-in Haaland an la hman a, Real Madrid-in Karim Benzema an la nei a, hei vang hian kum 2024-a contract zo mai tur Kane atana club pan châkawm deuh chu Bayern Munich leh Manchester United a ni thei ang.

Man United hian Kane hi nipui bazara lakluh an duh a nih chuan Spurs hi an hneh a ṭul a, club zawm châkawm an ni tih an lantir a ngai dawn. Chutihrualin club ṭantuten Kane-a chungah zahna an lantir a ngai tel dawn a, chumi awmzia chu zanina mit fukna tur chu Kane a ni ang.

Mason tan chona thar

Kum 2021 khan Jose Mourinho hoin Spurs-in League Cup final an lut a, club thuneituten final hmain Portuguese manager an ban. Wembley Stadium-a Spurs enkawltu chu tun ṭuma manager lailawk Ryan Mason hi a ni a, team ṭha zawk Manchester City lakah 1-0 in an tlawm. Mourinho ṭantute chuan Spurs hi dawhthei hret se chuan nomawi an chawi an ring hial.

English midfielder Mason erawh player ropui emaw coach ropui emaw a ni lo a, player vantlang niin inhliam vangin football khelh a chawlhsan. Tunah hian Mason hi kum 31 mi chauh a ni a, kum 2021-a Spurs a enkawl zawk tih loh chu club enkawl kawngah chhuan tur a nei lo. Chutihrualinimanager chhuak ta Conte hnuaiah khan coaching staff-ah telin Italian manager hi training a kaihhruai danah a lungawi hle.

Mason-a'n Man United laka hnehna chang turin rang taka insiamrem a mamawh a, Newcastle laka mualpho captain leh keeper Hugo Lloris an inhliam. French keeper bakah hian Emerson Royal, Yves Bissouma leh Rodrigo Bentancur te an la inhliam bawk.

United ve thung

FA Cup final hma chu Premier League-ah Man United an insawrbing thei ta a, chutihrualin Pathianni zanah an elpui Aston Villa an hmachhawn dawn avangin Erik Ten Hag-a'n player a siksawi thiam a ṭul ang. Season tluanin Lisandro Martinez leh Donny van de Beek te an chhawr thei dawn lo a, Raphael Varane a la dam lo bawk.

Hrem vangin FA Cup semifinal-ah captain Harry Maguire a inlan lo a, zaninah erawh English defender hi a inlan thei dawn - lawm leh lawm lo an kat nuk ang. Maguire awm loh ṭumah Luke Shaw a inlan a, Victor Lindelof nen an inkawp. Ten Hag-a tan thutlukna siam a harsa ang.

Man United buaina chu goal khungtu a ni a, Spurs laka hnehna an chan theih nan Marcus Rashford a rawn chet ṭhat a ṭul ang. Jadon Sancho leh Antony te pawhin an theihna tak lantir a hun a, Anthony Martial pawhin season thara Ten Hag-a game plan-a a tel theih nan a hun ṭha neih a hman ṭangkai a ṭul dawn bawk a ni.