Nuggets leh Suns an tlang

Denver Nuggets leh Phoenix Suns te chuan Western Conference semifinal an lut a, team pahnih hi conference final luh inchuhin an inkhel zui leh ang - April 29, Inrinni zingah game 1 an khel ang.

Nimin zing NBA playoff inkhelah Nuggets chuan Minnesota Timberwolves chu 112-109 in an hneh a, inkhel dangah Suns chuan Los Angeles Clippers chu 136-130 in an hneh ve bawk - team pahnih hian series 4-1 ve vein an la.

NBA Most Valuable Player (MVP) ni lai Nikola Jokic chuan Nuggets tan point 28 a nei a, rebound vawi 17 lain assist vawi 12 a nei bawk. Western Conference seeded pakhatna tan point 35 neitu Jamal Murray a thawhhlawk hle bawk.

Tun hnai season nga chhunga a vawi li nan Nuggets hian conference semifinal an lut, regular season an hman dan leh Minnesota Timberwolves laka an khelh dan chuan beisei an nei sang, champion tur erawhin kawng a la thui dawn.

Phoenix lamah Suns tan Devin Booker chuan point 47 a nei a, an match hmasa berah chak lo zauh mah se a hnuhnung paliah Suns an chak vek. Clippers lamin hliam vanga Paul George leh Kawhi Leonard an chhawr theih loh an tuar hle.

Eastern Conference lamah Atlanta Hawks chuan an beiseina tinung turin Boston Celtics chu 119-117 in an hneh. Best of seven series khelh turah Boston hian 3-2 in hma an la hruai mek. April 28, Zirtawpni zing dar 6:00-ah game 6 an khel leh dawn a ni.

NBA champion lai Golden State Warriors chuan tukin dar 7:30 hian Sacramento Kings nen game 5 an khel ve dawn bawk a, team pahnih hi series-ah 2-2 in an inhnehtawk mek - an inkhelhna tur hi Kings mual Golden 1 Center a ni ang.