Nadal ring tawktu Toni Nadal

Rafael Nadal a hlawhtlina phenah hian mi pawimawh bik a awm, a hming chu Toni Nadal a ni. Toni-a hian a tupa chuan ṭha takin French Open a la khelh leh theih ngei a beisei thu a sawi a, a la ringtawk hle.

Australian Open 2023 hnuah Nadal-a'n tournament a la khel leh lo. Clay court inelna lian French Open hi May 28 aṭanga khelh tur a ni tawh si, tunah hian inbuatsaihna ṭha a nei hman dawn lo tih chu a chiang tawh.

Nadal-a coach hlui, a putea ni bawk Toni chuan, "Rafa hi a dam chho mek, mahse Madrid Open khel tur chuan a la inpeih lo. Tournamnet a khel lo rei tawh a, chumi bakah chuan a mamawh ang inbuatsaihna a nei thei dawn lo bawk.

"Mahse, Grand Slam hi chu a danglam, inkhel tur pawh fuh dan a zirin thil a danglam ve thei hle bawk. Round hmasa lama player hautak tawn loh chuan kawng a inhawng zau ṭhin, ka hmuh dan chuan last 16 chu a luh leh mai ka ring.

"Thil sawi lawk vek a harsa, chutihrualin Roland Garros hi chu Rafa nen hian a inzawm ve tlat a, a vanneih leh mai chu ka beisei pui a ni. Tuna pawimawh hmasa chu natna nei miah loa a inkhelh theih hun nghah a ni," a ti.

Nadal hi Indian Wells leh Miami Open aṭanga a inhnuhdawh kha chuan a chawl rih deuh mai dawna ngaihna a awm, clay court season atana a inkhek niah an ngai. Mahse, Barcelona, Madrid leh Monte Carlo Masters aṭangin a inhnukdawk bawk - Nadal dinhmun hi a ṭha lo.

Grand Slam champion hnem lamah Novak Djokovic nen an innihrual mek, major title 22 ve ve an nei tawh. Tun dinhmunah player ropui pahnih hi inkhel thei loin an chawl mek - Paris khawpuiah player dang tan kawng a inhawng zau a nih pawhin a mak lo ang.