Villa-ah Emery hnathawh a lang zel

Aston Villa-in Unai Emery hnuaiah harhtharna an chang a, Steven Gerrard hnuaia tla thei dinhmuna ding khan season thara Europe inelna lian khelh an inbeisei tawh. Thawhlehni zan khan Villa hian khualmuala 3-0 a an hneh loh Fulham an mikhual a, Tyrone Mings goal hmangin 1-0 in an chak.

Fulham-in second 30 lekah Andreas Pereira hmangin chance an nei a, Brazilian midfielder bicycle kick chu goal sirah a kal. Villa an insiamrem a, Fulham-in chance ṭha an nei tawh lo. Minute 21-naah John McGinn-a corner kick pet chu Mings-a'n a tauh goal.

Unai Emery hote hi Premier League match hnuhnung 10-ah tlawm an nei lo a, kum 2010 hnuah Europe inelnaa tel an inbeisei leh mek. Villa hian Europe inelnaa an inlan hnuhnun ber hian Europe League playoff-ah Rapid Vienna an hneh lo.

Spanish manager Emery hian November thlatir aṭangin Villa hi a enkawl ṭan a, league match 20 aṭangin vawi 13 an chak. An tlawm hnuhnun ber chu Ferbuary thlaa Arsenal laka 4-2 a an chak loh kha a ni.

Manchester United leh Manchester City te FA Cup final-ah an inkhel dawn a, season tharah pasarihna chinin Europe inelna an hmachhawn dawn. Pangana leh parukna team ten Europa League group stage an khel dawn a, pasarihnain Europa Conference League playoff an khel ang.

Villa hi Europe inelnaa tel turin an kutah engkim a awm a, chutihrualin team ṭha Manchester United, Tottenham, Liverpool leh Brighton te an la hmachhawn dawn. Hei chauh hi a ni lo, West Midlands derby-ah Villa hian Wolves an la hmachhawn a ngai bawk.