Real veltu Castellanos - Barca an champion dawn?

Spanish champion Real Madrid-in Thawhlehni zan khan an beisei loh result an hmu a, Girona khelmualah 4-2 in an tlawm - Girona striker Valentin Castellanos chuan Real lakah goal li ngawt a lo khung a, Madrid khaw club an mualpho.

Real tan hian Vincius Jr leh Lucas Vazquez ten goal khung ve mah se awmzia a nei phak lo a, mualpho zualpui khuhna chauh a ni. Carlo Ancelotti naute an tlawm leh tak avang hian Barcelona chu champion chiang ang hiala sawi theih an ni tawh.

Madrid hian point 11 ngawtin hmahruaitu Barcelona an thlau chhunzawm a, match khatin an khel tam thung. Catalan club hian nizan khan Rayo Vallecano chu khualmualah an lenchilh a, result kan hre hman lo.

Xavi naute hian hnehna an chang a nih chuan point 14 ngawtin Real an tlansan dawn tihna a ni a, league match sarih chiah khelh a ngaih tawh dawn bawk avangin champion chiang ang hiala chhiar ngam an ni ang.

Barakhaih!

Real-in an ṭhat dan berin Girona an lenchilh thei lo. Pum na vangin keeper Thibaut Courtois chu squad-ah a awm lo a, hliam tenau vangin Karim Benzema a zin thei lo a, David Alaba, Ferland Mendy leh Eden Hazard te chu hliam vanga chawl mekin, Dani Ceballos chu hrem a ni bawk.

Ancelotti-a'n hliam tenau a neih thu a sawi Eduardo Camavinga erawh hruai a ni a, mahse, bul a ṭan lo - heti chung hian Real tana bul ṭan zingah Vinicius, Rodrygo, Marco Asensio, Luka Modric, Toni Kroos, Éder Militão leh Antonio Rüdiger te ho an la awm thei a, Girona nena khaikhin rual an ni lo.

Mahse, football-ah chuan eng pawh a thleng thei, tih a taka hmuhtirin kan awm nawn a, inkhel ṭan aṭanga minute 12-na lekah Girona tan Castellanos chuan goal hmahruai a khung - he goal a luh theih nana Girona ball inpe kual vel chu hmuhnawm a tling. Rodrigo Riquelme chuan ṭha taka Ivan Martins a pek hnuah, Martins hian Miguel Gutiérrez tan a kheng zeuh.

Gutiérrez hian ṭha zetin Castellanos tan a pe zui a, Argentine forward tan goal-a chantir turin harsatna a awm lo. Real an insiamrem hman lo - minute 24-naah Martinez-a ball thlawh luh ṭha zet chu Castellanos chuan um lutin, Andriy Lunin-a goal venah a chhuih lut a, 2-0 a ni der.

Beiseina thamral

Girona-in minute 25 tlin hmain goal hnih an khung a, mikhual Real an hnual phah lo - minute 34-naah Vinicius chuan si phurh a sut ṭhen a, Asensio ball thlawh luh chu hnai set sawt aṭangin a tauh lut.

Real an phur sawt a, mahse, an beisei angin thil a kal zui lo. Goal dang lut loa chawlhlawk hman a nih hnuin, second half aṭan aṭanga minute khatna lekah Castellanos bawk a inlar nawn - Yan Couto-a'n chak zeta ball a tlan luhpui chu Real box chhungah a thlawh lut a, Castellanos hian goal-ah a lo chantir.

A la tawp lo cheu - minute 62-naah Castellanos hian a goal lina a khung leh a, 4-1 a ni der! Real tan Vazquez chuan si phurh rawn sut ṭhen ve leh mah se awmzia a nei phak lo a, goal dang lut loa hun tawp hmang zuiin, Girona hi 4-2 in an chak.

December 1947 khan Esteban Echaverria chuan Real Oviedo tan Madrid lakah goal nga a khung a, hemi hnua Real laka goal li khung tling leh thei hmasa ber chu Castellanos a ni - a record hi a chhuanawm hle.

A hming Castellanos

Real lakah goal li a khung a, khawvelin Castellanos a ngaihven nghal - kum 24 mi striker hi Major League Soccer club New York City aṭangin Girona-ah hian loan-in a khel a, club pahnih hi Manchester City neitu City Football Group hnuaia awm ve ve an ni.

Argentina tana la inlan lo Castellanos hian Chilean club Universidad de Chile aṭanga a professional career ṭanin, Uruguayan club Club Atletico Torque-ah a khel tawh bawk a, 2018 aṭang khan NYC tana khelin match 134-ah goal 59 a khungsak.

Kum 2021 khan MLS match 32-ah goal 19 khungin golden boot a dawng a, MLS Best XI-ah telin, MLS-ah a champion pui bawk. NYC hian season hmasa ṭan dawn khan pound maktaduai 12-a chhuah an rem ti a, mahse, amah duhtu Brazilian club Palmeiras leh Argentine club River Plate ten heti zat hian an ngam lo.

Rin loh takin European club an reh bawk - hei vang hian Girona lamah loan-a kaltir a ni a, NYC hian European football-a a khelh hian a hlutna a tihsan an beisei. Tun season-ah league match 29 khela goal 11 khungin, assist vawi khat a nei tawh.