Foxes point hmuhna Vardy-a goal

Hun tawp dawna substitute Jamie Vardy-a goal khung hmangin Leicester City chuan Leeds United laka an siphurh an sut zo a, team pahnih hi 1-1 a inhnehtawkin point khat ve ve in an insem.

Leeds tan Colombian winger Luis Sinisterra chuan minute 20-naah goal hmahruai a tauh lut, an goal khat hi an hum tluan teuh hle. Mahse, English striker Vardy-a'n hun tawp dawnah James Maddison hnen aṭanga a ball hmuh a khung.

Hliam vangin Vardy hi tun season chu a inkhel tam lo, tun hnaia a rawn inlar leh ta hi Leicester City tan chuan chanchin lawmawm a ni ang. Season thara Premier League an khelh chhunzawm beiseina pawh a sang leh hret dawn.

Vardy chuan, "Match khelh hmabak panga kan la nei, kan tan chuan final vek a ni tawh. Point kan hmuh avangin ka lawm a, harsatna nei loa ka inkhelh theih avang pawhin ka lawm hle bawk.

"Tun season chhunga harsatna hrang hrang ka tawh hi mipui hmaa sawi chhuah vek chi pawh a ni hran lo. Tunah chuan Foxes tan theihtawp tak meuh ka chhuah chhunzawm dawn," a ti.

Leicester City hian EPL match 33 aṭangin point 29 an hmu a, table-ah 17-na an ni mek. Tla thei china awm Everton aiin match khatin an khel tam a, an inthlauhna chu point khat chauh a ni - an dinhmun a him lo hle.

Manager Brendan Rodgers bana Dean Smith ruaitu Foxes hian - Everton, Fulham, Liverpool, Newcastle United leh West Ham te an la hmachhawn dawn a ni.

Leeds pawh an dinhmun a him bik lo, 16-na ni mek mah se point 33 chauh an la nei. An hmabakah Bournemouth, Manchester City, Newcastle United, West Ham leh Tottenham te an la awm thung.