East Bengal coach thar Carles Cuadrat
Indian Super League club East Bengal chuan coach Stephen Constantine nen an inṭhen hnu lawkah Carles Cuadrat chu coach tura an lakluh thu an puang a, Bengaluru FC coach hlui hian Kolkata club-ah hian kum hnih chhung coach ni turin contract hi a ziak a ni.
Kum 54 mi Cuadrat hian kum 2016 khan Bengaluru FC chu assistant coach ni tura zawmin, Indian football-a a zinkawng a zawh ṭan a, hetih chhung hian Federation Cup leh Hero Super Cup-a an champion bakah Indian club zinga AFC Cup final lut hmasa ber an ni bawk.
Bengaluru hi coach Albert Roca chuan chhuahsan zuiin, 2018-19 season ṭan dawn khan Cuadrat hi coach ni tura lakluh a ni zui - a season hmasa berah Bengaluru chu ISL champion a nihpui nghal a, ISL-a league round-a hmahruaitu ni chunga champion thei hmasa ber an ni.
Cuadrat hian 2019-20 season-ah pawh Bengaluru hi ISL playoff a khelhpui a, mahse, January 2021 khan Bangalore club hi a chhuahsan tur thu puan a ni.
Spanish coach hian India a chhuahsan hnuah coaching a chawlhsan bik lo. Cypriot Club Aris Limassol chu assistant coach ni turin a zawm a, top flight league-a kai hlim club hi playoff khel tur hialin a hruai - East Bengal a zawm hma hian Danish Superliga club FC Midtjylland-ah assistant coach ang thoin a thawk.
Carles Cuadrat chuan, "East Bengal-ah kum hnih chhung coach hna ka chelh thei tur hi ka lawm takzet. Club sulhnu ngah tak leh, Indian football-a nomawi tam tak lo chawi tawhin an coach tura min duh hian min tilawm hle a ni," a ti.
Player a nih laia Barcelona leh Spain tana age level hrang hranga lo inlan tawh Cuadrat hian coaching pawh Barcelona coach ropui Frank Rijkaard-a hnuaiah a ṭan a, Catalan club-ah zawm hman lo mah se Galatasaray leh Saudi Arabia a enkawl khan coaching staff zingah a tel a ni.
Cuadrat tan East Bengal siam ṭha tur erawh chuan tih tur tam tak a awm dawn. East Bengal hian 2020-21 season aṭang khan ISL hi khel ve ṭanin, an season hmasa berah hian league match 20-ah vawi thum chiah an chak a, team 11 inelnaah pakuana niin season an khar - coach atana Liverpool legend Robbie Fowler an lakluh chu an tifuh lo hle.
Season hmasa khan Real Madrid B team boss hlui Manolo Díaz hoin bul an ṭan a, season a tawp meuh chuan Renedy Singh leh Mario Rivera Campesino te pawhin an enkawl hman a, match 20-ah vawi khat chiah chakin, table mawngphah an luah.
Tun season-ah India coach hlui Stephen Constantine hnuaiah insiamṭha hretin, match 20-ah vawi ruk an chak ve a, ISL season khata an chak ngun ber a ni. Mahse, table-ah pakuana niin season an khar a, Constantine duh khawp loin an inṭhenpui a, Cuadrat lam an hawi ta.