Champion tura rinkai ka ni lo - Alcaraz

Carlos Alcaraz chuan Madrid Open nomawi a kawl lai humhim ngei a tum tih a sawi a, chutihrualin Rafael Nadal leh Novak Djokovic te inlan thei lo mah se champion tura rinkai ber a nih bik loh thu a sawi.

Spanish rawlthar Alcaraz hian kar hmasa khan Stefanos Tsitsipas hnehin Barcelona Open nomawi a chawi. Greek tlangval Tsitsipas hi clay court-a inkhelh thiam ve tho a ni a, tun kar tawp lam aṭanga khelh tur Madrid Open-ah pawh a tawh a khirh leh khawp ang.

World number 2 Alcaraz chuan, "Player ṭha pahnih an inlan dawn loh avangin a awlsam dawn emaw tih an awm ṭhin, mahse chutiang ngawt chu a ni bik lo. Player dang theihna nei sang tak tak an tam.

"Ka kum rualpui leh kei aia upa deuh zingah pawh hian ṭha tak tak an awm, chuvangin anni hmachhawn hi engtiklai mahin a awlsam ngai lo, tumah rinkai leh dinhmun ṭha sa bik tia sawi theih a ni lo," a ti.

US Open 2022 champion a nih hnuah Alcaraz hian world number 1 dinhmun a luah zui a, mahse hliam vangin thla li a inkhel mumal thei lo. A hliam a dam fel hnuah erawh player hlauhawm berte zinga mi a ni leh tawh.

Alcaraz chuan, "World number 1 nih hi chu rilruah a awm, chutihrualin nomawi leh ranking hi ka inkhelh chhan ber a ni lo. Tun ṭumah pawh hian nuamti taka khelh chu ka tum hmasak ber tur a ni ang," a ti.

Alcaraz hi seeded pakhatna pek a ni a, first round a khelh hah a ngai dawn lo. April 28, Zirtawpni zanah qualifier aṭanga in vaw tling nen a match hmasa ber a khel ang, a khingpui tur hi a la hriat loh.