Gujarat-in Mumbai an sawp

Indian Premier League champion lai Gujarat Titans-in Thawhlehni zan khan Mumbai Indians chu 55 runs-in an hneh a, Hardik Pandya hote Rohit Sharma hote lakah kawng engkimah an chungnung. Match sarih khelh zawhah Titans leh Chennai Super Kings ten point 10 ve ve an hmu a, table chung lamah an awm.

Narendra Modi Stadium-ah Mumbai-in vawm hmasak an thlang. Titans tan Shubman Gill-a'n 56 runs a siam a, David Miller (46) leh Abhinav Manohar (42) te an rawn thlawp ṭha bawk a, over 20-ah 207 runs an vaw chhuak. Mumbai tan target a sang mah mah a, captain Rohit Sharma-a'n run hnih chauh a siam tihin pavilion-ah a kir.

Over 20-ah Mumbai-in 152/9 runs chauh an siam a, Titans an chungnung hle. Gujarat-ah hian Afghanistan player pahnih Rashid Khan leh Noor Ahmad, Irish player Josh Little leh South African player David Miller te an ṭangkai a, Indian player-te team angin an ṭha bawk.

Zanin hian hmahruaitu Chennai Super Kings leh Rajasthan Royals te an inkhel ang. IPL-ah hian vawi hnih ṭheuh an inkhel chhuak dawn a, thawh khatna chu an zo tawh. League round a zawh hian a sang paliin qualifier an khel dawn.