Dortmund leh United thu a inhmu lo

Manchester United-in Borussia Dortmund aṭangin Jadon Sancho an lalut mai dawna a lan laiin boruak dang a awm. United hian kum 20 mi Sancho man atana Dortmund phut zat pound maktaduai 100 bawr vel chu tam an ti a, German club hian a tihniam a nih loh chuan English club hian indawrna tihtawp an pawi ti lo.

United-in nipui transfer chhunga an lakluh duh ber chu Sancho a ni a, chutihrualin Covid-19 vangin sum lakluh a tlak hniam phah hle. Ole Gunnar Solskjaer chuan, "Thu thar engmah ka hre lo, ka hria a nih chuan ka hrilh ang che u. Transfer hun rei tak a awm a, transfer tin hian kawng hrang ṭheuh an zawh," tiin a sawi a, a ṭawng fimkhur hle.

Manchester United hi Alexis Sanchez an lakluh danah an chesual tawh a, tihsual nawn an tum lo. Arsenal aṭanga Sanchez an lakluh theih nan Chilean forward hi kar khatah £400,000 an hlawhtir a, tunah erawh Barcelona player hlui theh thang dan turah an buai ta thung.

United hian tun hnai thla 13 chhungin forward pahnih Marcus Rashford leh Mason Greenwood bakah keeper David de Gea te contract thar an ziahpui. Hun tep ter taka contract ziah vanga sum tam tak sen nawn ang kha United hian pumpelh an tum.

Borussia Dortmund-in an duh ang zat sum hmuhna tur a nih chuan Sancho hralh an pawi ti lo a, chutihrualin season thar atana an inpuahchahna tihbuai an duh lo. German club hian United hi hun an bi tuksak a, August 10 hmaa thutlukna siamfel turin an ti.

United hian a lo thlawna Dortmund sum pek an tum bik lo a, Sancho an mamawhna sang mah se a thlakna tur dang an dap tel. English club hian Covid-19 vanga an sum hloh tur zawng zawng an chhut tel a, chumi hnua an sum thehchhuah phal zat hi Dortmund beisei zat a ni pha lo.

English winger Sancho hian Old Trafford a pan dawn a nih chuan Dortmund emaw United emaw an inhnuh hniam a ṭul dawn. German club-in United hi August 10 thleng hun pe mah se kumin transfer hi October 5 thleng a ni dawn a, nipui transfer tingaihnawmtu a ni chho zel ang.