Europa League Champion ngun ber Sevilla hmaah AS Roma

Europa League-ah Sevilla-in vawi nga final an lut tawh a, hnehna an chan vek bawk avangin champion ngun ber an ni. Spanish club hian zanin dar 10:25 hian MSV-Arena, Duisburg-ah AS Roma an hmachhawn dawn.

Sevilla leh Roma hi an vawi khat intawnna tur a ni a, Serie A club hian Spanish club vawi sarih an hmachhawn tawhah vawi khat chiah an chak a, vawi ruk an chak lo. Chutihrualin Europa League last 16 match riat khelh tur zingah Sevilla leh Roma hi in buk tawk bera sawih theih a ni.

Julen Lopetegui hoin Sevilla hian season ṭha tak an hmang a, La Liga-ah palinaah an awm. Tlarhmaah Lucas Ocampos, Munir leh Luuk de Jong te an kawl a, forward pathum goal khung zat belh khawm chu goal 33 a ni. Roma hi Serie A-ah pangana an ni thung a, Europa League-ah Manchester United aṭanga an hawh Chris Smalling an chhawr zui thei dawn lo.

Chutihrualin Roma hian Edin Dzeko, Henrikh Mkhitaryan leh Justin Kluivert te an kawl tih hriat a ṭha. Europa Leauge inkhel dangah Molineux Stadium-ah Wolverhampton Wanderers-in Olympiakos an mikhual tur hian ngaihven a hlawh bawk. Wolves hi Premier League-ah pasarihnaah an awm a, season thara Europe-a inlan zui turin Europa League nomawi an chawi ngei a ngai.