Man City laka tih theih nei lo Arsenal

Manchester City chuan Arsenal chu zirtirna an pe hlak. Citizens hian, "Premier League nomawi chu kan ta a ni a, kan kawl lai a ni. Nang chu lo la kiang leh rih phawt rawh u, inla nau deuh e," tih an sawi ri kher lo, mahse thil tih hmangin an lantir thung.

Premier League hmahruaitu Arsenal chu Manchester City khelmualah 4-1 in an tlawm. Mikel Arteta naute hi table chung berah la awm mah se, an hnuaia awm City aiin match hnihin an khel tam zawk, an inthlauhna chu point hnih chauh a ni.

Nilaini zan inkhelah Citizens tan Kevin de Bruyne-a'n goal hnih a khung bakah John Stones leh Erling Haaland ten goal khat ve ve an khung. Mikhual Arsenal tan defender Rob Holding-a'n goal khung ve mah se an beiseina a tinung zo lo.

Gunners hian an khelh hmabakah hnehna chang vek pawh ni se, an elpui Manchester City an chesual viau a nih ngawt loh chuan champion theih a ni tawh dawn lo. Chet ṭhat bakah midang chetsual an chân tel a ngai dawn ta.

A hma boruak

Beisei phak baka season hmang ṭha Arsenal chet fuh lai ber a ni lo, tun hnaiah a zawna match thum chhung chak ni hmel hmu lo chungin Etihad Stadium an lut a, chak an harsatna hmun a nih avangin beisei an nei sang ngam lo.

Mikel Arteta-a'n an hna hautak tur thu a sawi lawk a, defender rinrawl William Saliba tih loh chu a player rinrawl leh a neih ṭhat ber ber a thawhchhuahpui. Spanish manager hi a intlawh khalh lawk a, inelna zawng zawng tawpna a nih loh thu a sawi bawk.

Pep Guardiola erawhin 'Premier League Final' tiin a sawi hmiah a, ni dang zawng aiin fans puihna an mamawh zual tih a sawi bawk. Inkhelh ṭan hmain EPL nomawi an kawl lai phochhuah a ni a, fans leh player rilru a titharin phurna nasa tak a siam.

Pep-a thluak

Khelh duh dan bik a nei a, chutianga khel thei player chu a zawng mai ṭhin. Erling Haaland an neih hnuah Manchester City khelh dan phung a inthlak mek, chumi atana ṭha tawk lo Joao Cancelo chu a chhuahtir hreh lo.

John Stones chu defensive midfielder ang maia chhawr a ni a, a tlan chhuak tamin ball a sem hnem. Tun season tir lama a duhkhawp loh Kyle Walker chu a ring tawk leh tawh bawk - goal nawr chu Kevin de Bruyne, Haaland leh Jack Grealish te hna a ni thung.

Arsenal hmanraw hlauhawm Gabriel Martinelli leh Bukayo Saka te dang chat turin Walker leh Manuel Akanji te an awm a, Arsenal forward pahnih hi hmun awl siamsak chi an nih loh avangin City defender pahnih hi tlan chhuak tam lo tura tih an ni.

Goal a lut

Guardiola-a'n goalkeeper Ederson chu ball sem tuah a hmang. Brazil international hi ball pet thiam bik zinga mi a ni a, an khingpui lamin an nawr pawhin a chi ai ngai lo, a ball petchhuah chu Haaland-a'n amah vengtu Holding nek kiangin De Bruyne tan a siamsak.

De Bruyne hian Oleksandr Zinchenko a tlan chhuak nasa ṭhin tih a hria, a hmun ruak zau lamah ball tlanpuiin keeper Aaron Ramsdale dan phak lohin a khung. Holding-a'n a ven tur a ven hneh loh a pawi a, goal khungtu KDB a che class thung.

Belgian midfielder hian a hnu lawkah pawh Holding kapkarah ball a pet luhsak - English defender hian a mihring a lo titlu thung. De Bruyne hian Stones tauh luh tur a siamsak zui bakah Holding kapkar aṭangin an goal thumna a khung bawk.

Arsenal defender Holding-a'n an mualpho lutuk tur hliahkhuh nan goal a khung hlauh a, mahse hun tawp dawnah Haaland chuan tun season league goal 33-na a khung, a siamsaktu Phil Foden-a'n ball kang lai a la thla mawi hle.