Liverpool tan kawl a êng ṭan?

West Ham United lakah goal chhuah hmasa zet mah se Liverpool chuan khualmualah Hammers hi 2-1 in an hneh a, league match thum chu a zawnin an chak ve leh ta - Liverpool tan kawl a êng ṭan ve leh ta tiin a sawi theih.

Tlak hlau Hammers tan Lucas Paquetá chuan minute 12-na lekah goal hmahruai a khung a, mahse, Reds tan Cody Gakpo leh Joel Matip ten khung ve lehin, hun a tawp meuh chuan 2-1 in Liverpool an chak.

Liverpool hian hnehna an chan avangin table-ah parukna dinhmun an luah ve leh ta a, Champions League rim an hre pha ṭan leh tawh - palina Manchester United chu point rukin an thlau mek.

Mahse, Red Devils hian match hnihin an la khel tlem zawk tih hriat a ṭha. United hian nizan khan Tottenham Hotspur chu league match khelin an lenchilh a, result kan hre hman lo - he inkhel result hian Reds dinhmun a sawi danglam leh ang.

Hammers tan beiseina

West Ham-in season thara Premier League khelh chhunzawm zel turin chak an mamawh tih an hria a, Liverpool-in season thara Champions League khelh beisei chhunzawm turin chak an mamawh tih an inhre bawk - goal khung hmasa zawk erawh Hammers an ni.

Inkhel ṭan aṭanga minute 12-na lekah Paquetá chuan ṭha zeta ball lalutin, Michail Antonio nen mawi taka an in one-two hnuah a hmawr a bawk a, Liverpool goalkeeper Alisson tana dan rual lohin yard 20 vel aṭangin a pet goal - minute 12-na a ni.

Mahse, Hammers fan-te hlim chhung chu rei lo tak a ni - an hlim authawm pawh a reh hmain Gakpo a inlar a, Trent Alexander-Arnold-a ball pek ṭha zet chu Dutch forward hian penalty box pawn aṭangin a chhuih lut.

Minute 20 pawh a tlin hmain goal hnih a lut a, 1-1 a ni. Team pahnih an innawr chhunzawm a, mahse, goal dang lut loin chalwhkawk hman a ni.

A chhanna Matip

Liverpool-in tlarhmaah Gakpo, Mohamed Salah, Diogo Jota an tlar thei a, bench-ah lah Darwin Nunez leh Luis Diaz an la awm bawk - mahse, Reds ho chhanchhuah nana goal khungtu erawh defender pasang Matip a ni.

Minute 67-naah ven loha awm Matip hian Andy Robertson-a corner pet chu kawh zetin a tauh lut a, tihngaihna hre loin Hammers player an hawihai - mikhual team-in 2-1 in hma an hruai.

Hammers hian Thiago Alcântara handball vangin si phurh sutna remchang an nei dawnah an inngai a, mahse, referee Chris Kavanagh chuan penalty turah a ngai lo a, video assistant referee duty Neil Swarbrick pawhin inrawlhna tur niin a ngai lo.

West Ham an vannei tawk lo tiin a sawi theih - Jarrod Bowen-a goal khung chu offside vanga pawm a ni lo bawk a, Hammers-in hlawhchhuah nei loin Liverpool an mangṭha.

Hei le Liverpool

Tun season hmang chhe tak Liverpool-in league match thum a zawna hnehna an chan tak avangin an inringtawk sawt ang tih a chiang a, Reds hian league match ruk khelh tur an la neih aṭangin Spurs chu team lian an la hmachhawn tur awmchhun an ni tawh.

Sawisel hlawh tak Trent Alexander-Arnold a hmuhnawm leh ta a, Liverpool right back hi midfield-ah a duh ang thala tal tura zalenna pek tel a ni a, a league match hnuhnung paliah assist vawi nga zet a nei thei.

Reds tan a league match hnuhnung pahniha goal li khungtu Diogo Jota chuan chance vawi hnih ngawt a hlah a, hetihlai hian Virgil van Dijk-a'n Antonio goal khung tur a tihbuai hman te, Tomas Soucek leh Bowen ten an chance an chhawr loh chu Hammers pawhin an ui ang.

A tawpah erawh Liverpool tak tak kan hmu leh ṭan ta niin a lang a, Kop ho an phur khawp ang. Hammers lakah 73% ball changin, vawi 20 shot an nei a, target-ah vawi li a kal.

Handball kha?

Thiago-a'n a kutin ball a tawk fuh ngei a, mahse, Spanish midfielder hi a tlukna lama inbengkang tuma inveng a ni a, hetihlai hian ball hian a kutah a fuh - football danah chuan tihluih ni lo, tlu tur invenna lama ball in kut a tawh fuhin hrem tur a ni lo.

Mahse, West Ham boss David Moyes a lungawi lo - Scottish coach chuan Thiago hi penalty chawi ngei turah a ngai. Moyes chuan, "Penalty kick ngei tur a ni. Thiago khan ama duhthua tlu sain ball ava chuh a, khatiang kha chu tlu tur inven leh mahni sa himna tur ngaihtuaha invenna nen a inang lo," a ti.

Moyes chuan sawi zawmin, "Khatiang chiah kha Anfield-ah tawng ve ta ila, penalty a nih inring em?" tiin media a zawt a, penalty an hmuh loh chhan chu team tenau zawk an nih vangah a ngai.

Scottish coach chuan sawi zawmin, "Ka rilru ti natu ber chu VAR a ni. Referee hnena ennawn tur tak ngial pawha VAR-in a hrilh lo kha chu, kan tan chuan inzahlohna a ni," a ti a, a lungawi lo hle.

Premier League & Europe

• Premier League table-a pakhatna aṭanga palinate chu Champions League khel turin an tling ang. Arsenal chu season thara European club football inelna sang ber khel tura tling chiang tawh an ni.

• Premier League table-a parukna chu Europa League group stage khel turin an tling ang.

• FA Cup champion chu Europa League group stage khel turin an tling ang.

• League Cup champion chu Europa Conference League playoff khel turin an tling dawn.

• FA Cup champion chuan Premier League top five-a season an khar chuan, league table-a European football khel lo tur zinga a sang ber chuan Europa League group stage hmun ruak an chang ang.

• League Cup champion chuan Premier League top five-a season an khar chuan league table-a European football khel lo tur zinga a sang ber chuan ECL playoff hmun ruak an chang dawn. FA Cup champion-in top five-a season an khar erawh chuan ECL hmun ruak midangin an channa turin League Cup champion tan top six-a season khar pawh a tawk dawn a ni.

• FA Cup final-ah Manchester City leh Manchester United an inkhel dawn a, City hi an champion chuan Europa League-ah Premier League table-a pangana leh parukna an lut ang.

• Manchester United an champion a, top four-a season an khar bawk chuan Europa League-ah Premier League table-a pangana leh parukna an inlan ang a, ECL-a League Cup champion (Manchester United) hmun ruak chu league-a pasarihnain an chang ang.