Kan kutah a awm - Guardiola

Manchester City manager Pep Guardiola chuan chak ngei ngei ngaihna inkhelah hnehna an chang tih a sawi a, an elpui ber Arsenal an hneh tak avangin Premier League nomawi chu an kutah a innghat tawh tih a sawi bawk.

Man City hi an hmabakah an chesual lo a nih chuan nomawi an humhim dawn, match hnih ngawta an khelh tlem avangin Gunners hnuaiah awm rih mah se an dinhmun a duhawm rih zawk - midang result ngaihchan an ngai ve lo.

Guardiola chuan, "Kan kutah engkim a awm tawh a, kan hmathlir leh thlen tum hi kan ngaihthah thiang lo. Match kan khelh hmabak pathum hian Premier League-a kan dinhmun chu a hril thei dawn a ni," tiin a sawi.

Citizens hian Fulham, West Ham leh Leeds United an tum zawn dawn, chumi hnuah Champions League semifinal khel turin Real Madrid an lenchilh ang - Spanish club lian an tum hma ngeiin EPL hmahruaitu nih ngheh an tum.

Premier League leh Champions League bakah FA Cup khelh hmabak an la nei, tun season chhungin nomawi hlu chin pathum chawi thei dinhmunah an la ding tihna a ni a, an hmabak erawh a la hautak chho ve dawn hle.

Barcelona leh Bayern Munich manager hlui Pep chuan, "Ka naute hian hnehna chan bak chu duhthlan tur an nei lo tih an hria, a hmawr bawk ṭha tur chuan kan chak zel a ngai, chak duha kan tuihal phawt chuan tih theih loh tur a awm lo," a ti.

Kevin de Bruyne pawhin nomawi chungchang sawiin, "Mite chuan a zawna vawi thum nan EPL title la tur angin min sawi, mahse match sarih khelh tur kan la nei. Tunah hian pahnihna kan ni mek bawk, chhiarkawp dana kan san ber hma chuan sawi theih a ni lo," tiin a ṭawng fimkhur hle.