UCL khel tur Arsenal

Arsene Wenger hunlai khan Arsenal hian Champions League an khel phak ṭhin, French manager hun hnuhnungah erawh an khel phak lo. Tunah chuan kum 2016-17 season hnuah a vawi khat nan UCL an khel dawn tih a chiang ta.

Premier League match khelh hmabak panga an la nei a, hmabak ngah tak chung hian palina aia hniamah an awm thei tawh lo. Gunners hi an champion lo a nih pawhin an hmelma Tottenham chungah season an khar dawn - UCL an khelh dawn bawk avangin lawm tur an ni.

Liverpool, West Ham leh Southampton nena an inhnehtawk hnuah Manchester City an lenchilh a ni a, inrintawkna an nei loin kawng engkimah Pep Guardiola naute an phak lo, an tan chuan zan theihnghilh daih tlak a ni ngei ang.

Mahse, hei hi hria ila - Man City duh tawh loh Gabriel Jesus leh Oleksandr Zinchenko te kha an rinrawl a ni a, team pahnih player neih an inthlau deuh. Season tira an beiseina neih kha chhut let ila, tunah hian khami laia an beiseina aia sangah khan an awmin a rinawm.

Season pawimawh vanglai tak an hman laiin defender rinrawl William Saliba a inhliam a, a sira khel ṭhin Takehiro Tomiyasu chu hliam vangin a chawl bawk. Tlarhnung phui vanga season tir lama an chakpui hram ṭhin ang kha an chakpui thei ta lo a ni.

Arsenal manager Arteta chuan, "Team ṭha zawk an chak, a englaiah mah khan kan elphak lo a ni. Chutihrualin season a la zo lo, khelh hmabak kan la neihah hian theihtawp kan chhuah chhunzawm dawn.

"Season tirah khan mite chuan parukna kan nih phak chuan a ṭha ang tiin an sawi ṭhin. Tuna kan thlen chin hi chhut ila ka naute hian hna ṭha takin an thawk, chuvangin an thlen chinah hian ka lawm, team ṭha zawk el phak tura inchherhriam erawh a ngai," a ti.