Oriflame MFA Cup: Melbuk leh Khawzawl chiah an dam ta

An inthlifim chho zel a, tunah chuan a thiam pahnih TMFC, Melbuk leh Vengthar GSA, Khawzawl te chiah an dam ta. Mizoram Football Association (MFA) hnuaia district hrang hrang inelna Oriflame MFA Cup 2023 hi April 29, Inrinniah a hmawr bawk a ni ang.

Nimin semifinal inkhel hmasa zawkah Champhai district aiawhtu TMFC, Melbuk chuan Serchhip Kawnpui 2-0 in an hneh a, inkhel hnuhnung zawkah inelna thlengtu Vengthar GSA, Khawzawl chuan 2-1 in Lawngtlai Vengpui FC an hneh ve bawk.

Melbuk manager Lawmsang-zuala'n semifinal an khelh hma khan, an winger Lalramchuana chu an hmawnraw hlauhawm a nih tur thu a sawi a, a sawi ang ngeiin Ramchuana hian Serchhip lakah goal hnih a khung.

Group match lama goal riat khungtu Serchhip lamin a chhanletna tur an nei lo. Mizo coach ṭha Lalsangzuala Hmar kaihhruai Melbuk hian Champhai district champion an nihna an lantir a, inkhel boruak sangah an hmuhnawm tual tual.

Serchhip hian player an nei ṭha, a tira an beisei ang thlap player thawhchhuahpui thei lo mah se thawhhona ṭha hmangin an thleng sang a, an tum ram thleng zo ta chiah lo mah se a thiam zual pali zinga tel phak pawh chanchin lawmawm a ni ang.

Khawzawl team Vengthar GSA pawhin an coach PC Lalchhanchhuaha (Lalnaua) sawi ang ngeiin attacking game an khel. Benjamin Lalruattluanga goal hmahruai khung chu Lawngtlai tan Lalkrawsmawia'n sut ve mah se, a thlengtu team tan V. Lalhriatrenga chuan chakna goal a khung zui.

Lawngtlai hi Mizoram Inter-District Junir Boys Football Championship neih zawh taka champion kha an ni a, senior huangah pawh champion zui an tum ngam. Mahse, Khawzawl tlarhnung an su hawng hleithei lo a, an vanneih ṭum a ni lo bawk.

Inelna hi Mizoram Premier League khel lo chin tana tih a ni a, district pakua an inlan. Player an ṭhat dan a rualkhai viau, boruak sang chinah erawh coach danglamna a lang tiin a sawi theih.

Final khel tur Khawzawl team hi Mizoram Premier League team RS Annex bakah Mizoram team kaihruai tawh Lalnaua enkawl an ni a, tunlai Mizo coach ṭha Lalsangzuala Hmar nen nomawi chawitu zawk nih an tum tur hi a hmuhnawm khawp ang.