Real chak loh hnuah Barcelona an tlawm
A mak asin - Real Madrid an tlawm a, Barcelona tan hei lo liama Carlo Ancelotti naute tlansan vang vangna hun ṭha a awm chuang lo. Mahse, Nilaini zan khan Barcelona hi an inlan a, khualmualah Rayo Vallecano chu 2-1 in an ngam lo!
Xavi-a'n Atletico Madrid an hneh zawha, "Rayo Vallecano nena kan inkhel tur hi a harsa dawn a ni," a tih kha, pressure lak kian a tumnaah ngaih a ni a, mahse, Spanish coach sawi ang ngeiin Vallecano hneh an lo awlsam lo.
Vallecano tan Alvaro Garcia leh Fran Garcia ten goal khat ve ve an khung a, Catalan club tana Robert Lewandowski goal khungin awmzia a nei phak lo - hun tawp thlengin goal dang a lut lo a, 2-1 in Vallecano an chak.
Hetihlai hian Atletico Madrid chuan 3-1 in Real Mallorca an hneh thung a, pahnihnaah tal season khar an tum chu an chhawm nung zel - Mallorca tan Matija Nastasic chuan goal hmahruai khung mah se Atletico hian Rodrigo De Paul, Álvaro Morata leh Yannick Carrasco hmangin an chhanglet a ni.
A mak!
Real-in rin loh taka Girona an ngam loh hnuah Barca an inlan a, Xavi naute hian an chak chuan point 11 ngawtin Real an tlansan dawn tih an hria - league match sarih chiah an hmabak zui dawn bawk avangin Barca tan champion a hnai lehzual dawn.
Mahse, Vallecano khelmualah rin loh lamin chance an nei hmasa zawk. Minute 17-na lekah Sergio Camello chuan Pedri tihsual zarzoin chance duhawm a nei a, mahse, Barca keeper Marc-Andre ter Stegen chiah a hmachhawn chungin goal-ah a chantir thei lo.
Minute hnih a liam a, Vallecano an chesual nawn tawh lo. Camello bawk kan hmu nawn a, ṭha zeta ball a tlan luhpui hnuah Alvaro Garcia tan a siamsak a, Garcia hian hmahruaina goal ni turin a khung.
Vallecano-in minute 19-na lekah goal hmahruai an khung a, Barca-in Lewy hmangin chance nei ve leh mah se an chhawr lo - goal dang lut loin chawlhlawk hman a ni a, 1-0 in Vallecano in hma an hruai.
A vawi hnihna
Barca fans tam takin Vallecano hmahruaina chu vanneih vangah an ngai a nih chuan an tisual tihna a ni - throw-in aṭanga ball kal chu Frenkie de Jong chuan tlu chungin a team tan siamrem a tum a, mahse, a chesual.
He ball hian Alvaro Garcia a per a, Spanish forward hian chak taka a tlanpui hnuah, Ter-Stegen tana man rual lohin goal-ah a chantir a, mualneitu team-in La Liga hmahruaitu lakah 2-0 in hma an hruai.
Hun tawp nan minute sarih chiah a awm tawh tihah Barca tih goal hun a thleng a, Lewandowski chuan Franck Kessie 'shot' dan per chu, chak taka tlan chungin goal-ah a shot a, tun season-a a league goal 18-na ni turin a khung - inelna hrang hrangah match 39 aṭangin goal 28 a khung tawh.
Polish striker hian match li zet chu inelna hrang hrangah goal khung loin hun a hmang tawh a, goal a khung ve leh ta hi a lawm khawp ang. Mahse, Barca-in goal dang erawh an khung zui lo a, rin loh takin khualmualah an tlawm.