Juve hnehin Inter Milan an tlang

Inter Milan chuan Federico Dimarco-a goal khat hmangin Juventus 1-0 in an hneh a, inkhel hmasa nen belkhawmah 2-1 a chakin Coppa Italia final an lut - Fiorentina leh Cremonese inkhela chak zawk nen nomawi an inchuh ang.

Juventus khelmual Allianz Stadium-a an inkhelh ṭumin team pahnih hi 1-1 in an inhnehtawk. Nilaini zan khan San Siro-ah second leg khelh niin, minute 15-naah Federico Dimarco chuan Nicolo Barella siamsak hmangin goal awmchhun a khung a ni.

Turin khawpuia an inkhelh ṭum khan hun tawp dawna goal khungtu Romelu Lukaku chu a goal khung a lawm dan avangin hnawhchhuah a ni a, inkhelh banah buaina a chhuak chhunzawm bawk.

Belgium international striker hi a tirah chuan second leg khel thei lo tura hrem a ni, mahse thil thleng hi ennawn a nih hnuah hremna hi an sut - manager Simone Inzaghi-a'n a duh a nih chuan a chhawr thei.

Inter manager Inzaghi-a'n Lukaku hi bench lamah hun a hman hmasak tir, minute 68-naah khelmuala luhtir niin goal khung chiah lo mah se mipui mit fukna a ni - final an khelh hun atan a la pawimawh leh ang.

Ban mai theih dinhmuna ding hman, mahse tun hnaia rawn che ṭha leh ta Inter manager Inzaghi chuan, "Ka naute khan hnehna chan phu khawpin an khel. Tuna a lan dan chuan tun season chhungin match 10 khelh tur kan la nei, final pakhat a awm belh beisei ang," a ti.

Serie A lamah che ṭha tawk lo mah se Inter Milan hian Champions League semifinal an lut, an hmelma AC Milan nen final luh an inchuh ang. Coppa Italia final an luh fel tawh bawk avangin season duhawm taka khar thei dinhmunah an la ding.

Juve manager Massimiliano Allegri chuan, "Team ṭha tak Inter Milan lakah minute 60 chhung chu ṭha takin kan khel a, tihsual palh pakhat kan neih zeuh vanga kan chak lo ta kha a pawi ka ti, tun hnaia kan result ṭha lo hi chu kan siamṭhat vat a ngai," a ti.

Juventus hi inelna hrang hranga an match hnuhnung panga aṭangin vawi li an chak lo. Serie A point 15 an paihsak an pek kir avangin league lamah chuan an dinhmun a ṭha. Europa League semifinal lama Sevilla an tum tur atan erawh insiamṭhat an mamawh takzet.