The Pride of London - Chak lo ṭhang Chelsea ☑

Premier League club langsar Chelsea tan vawi khat chak loh pawh chanchinthar a tling ṭhin a, tun season-ah erawh chanchinthar a tling tawh lo - Stamford Bridge-a 'The Pride of London' (London hmel timawitu) tih intar pawh lak thlak a hun ta e.

Nilaini zan khan Chelsea an tlawm leh ta a, an mikhual Brentford lakah 2-0 in an tlawm - Chelsea fan-ten season tawpah khawiah nge kan awm ang, tih ai chuan, engtikah nge season a tawp ang, tih chu an zawhna a ni tawh zawk.

Chelsea captain Cesar Azpilicueta chuan an lama a tihluh bakah, Brentford striker Bryan Mbeumo chuan goal khat a khung bawk a, Stamford Bridge-ah Brentford-in 2-0 in hnehna an chang.

Chelsea hian point 20 ngawtin palina Manchester United an thlau ta a, top four aiin relegation zone an hnaih zawk - 18-na Leicester City aia an sanna chu point 10 chauh a ni.

A har a ni

Chelsea-in Graham Potter an ban hnuah Frank Lampard an lalut a, mahse, kum 44 mi manager hian eng danglamna mah a la thlen thei lo - match nga kaihruai tawhin, Blues hi a la tlawmpui vek!

Premier League match thumah tlawmin, Champions League match hnihah Real Madrid an ngam lo. Hetih chhung hian Blues-in goal khat chiah an khung a, Nilaini zan thlengin goal khung tur an la nei hleithei lo.

Champions League round of 16 second leg-a Real Madrid an hneh loh ṭumin Blues an vanduai a, Spanish club ṭha lakah chance vawi tam an nei thei. Chak zo lo mah se Blues ṭantute an phur a, Lampard-a hnathawh a lang ṭan turah an ngai.

Mahse, Stamford Bridge-a an hneh 'ṭhin' ang team kha Nilaini zanah an mikhual a, an hneh lo mai ni loin an tlawm - first half chhung zawnga Blues chance neiha chhal ngam chu, Thiago Silva ball tauh naran tak chu a ni.

Tihpalh aw!

Chelsea tan chhanna a vang a, "Tihpalh aw," tih mai loh chu sawi theih a awm meuh lo - minute 37-naah corner aṭanga ball kal chu Azpi chuan an lamah a tilut palh a, minute 78-naah Mbeumo chuan ṭha zeta ball a tlan luhpui hnuin, chak nemnghehna goal a khung bawk.

Lampard-a'n tlarhmaah Raheem Sterling chu mal tlat tirin, N'Golo Kanté leh Conor Gallagher te a thlawptir a, bench lamah Joao Félix, Christian Pulisic, Mykhailo Mudryk leh Pierre-Emerick Aubameyang te ho an awm thung.

English coach hian minute 45-naah Auba leh Mudryk luhtirin, Blues inkhelin awmzia a nei sawt a, a bik takin Auba a khel ṭha - mahse, a pawimawh ber goal an keng tel bik lo a, a tawpah Brentford bawkin goal khungin, Chelsea an tlawm.

London club hian Thawhlehni zanah champion tum Arsenal an lenchilh zui dawn a, player a nih laia a thiam em avanga 'Super Frankie' hming lem an pek hian engtikah nge Blues a chakpui ang, tih chu zawhna awm mek a ni.