Vawiinah MCL final: RVL hmaah Chanmarians

Tualchhung cricket inelna ngaihhlut Mapuia Memorial Mizoram Cricket League (MCL) 2023 chu vawiin hian a hmawr bawk a ni dawn, team ṭha Ramhlun Venglai leh Chanmarians ten nomawi an inchuh ang.

Team paruk inel zingah Chanmarians an che ṭha a, league round-ah match nga an khelhah hnehna an chang vek. Table chung bera awm chungin league round an khar a, qualifier 1-ah Gorkha chu run 19-a hnehin final an lut.

Ramhlun Venglai pawh an match hmasa berah chesual mah se an insiam ṭha. Eliminator an khel zui a, inkhel harsa tura ngaihah Kulikawn chu wicket liin an hneh, nimin khan qualifier 2 khel zuiin an match hmasa bera an hneh loh Gorkha chu wicket khata hnehin final an inhlangkai.

RVL leh Chanmarians te league round lama an intawn tawhnaah Chanmarians hi wicket riatin an chak, vawiinah Ramhlun Venglai lam hian thawnthu ziah danglam ngei an tum ang.