Heat hmachhawn tur Knicks

Miami Heat chuan NBA Eastern Conference semifinal-ah New York Knicks an hmachhawn dawn, team pahnih hi an tlang chiang tawh. Champion lai Golden State Warriors pawhin tlang turin match khat chak chauh an hmabak ta.

Nimin zing inkhelah Heat leh Milwaukee Bucks an inbei tawk hle, hun pangngaia an inhnehtawk vangin over-time khelh a ngai, a tawpah Heat hi 128-126 in an chungnung ta zawk a, best of seven series chu 4-1 in an la.

Miami Heat tan hian Jimmy Butler a cha ṭha leh hle, match hmasa lama point 56 hmutu hian game 5-ah pawh point 42 a nei leh a, hnehna an chan theih nan a thawhhlawk leh hle.

A tirah Heat hi an che ṭha nghal mai bik lo, quarter linaah phei chuan point 16 ngawta hniam lai an nei. Bucks tan Most Valuable Player vawi hnih ni tawh Giannis Antetokounmpo-a'n point 38 ngawt nei mah se an chakpui zo lo.

Inkhel dangah Jalen Brunson-a point 32 hmangin New York Knicks chuan Cleveland Cavaliers lakah 106-95 in hnehna an chang a, seeded pangana Knicks tan kum 2013 hnua playoff series an lak lehna hmasa a nih avangin a lawmawm zual ang.

Western Conference lamah Denver Nuggets leh Phoenix Suns ten semifinal an lut tawh, anni pahnih hi Golden State Warriors chuan an zui thei dawn hnai niin a lang, match khat chak an la hmabak.

Golden State hi an match hmasa pahnihah an chak lo, mahse tun hnaiah erawh a zawna vawi thum an chakna ni turin Sacramento Kings chu 123-116 in an luhchhuah - point 31 neitu Stephen Curry a langsar leh hle.

April 29, Inrinni zing dar 5:30-ah team pahnih hian game 6 an khel dawn, an inkhelhna tur hi Warriors khelmual Chase Center a nih avangin Curry leh a hote hi tlang turin an dinhmun a ṭha leh ta zawk hle a ni.