Man City-in Ferran Torres an lalut fel

Manchester City chuan Valencia aṭangin winger Ferran Torres chu pound maktaduai 20.87 (€23M) in an lalut fel. Pep Guardiola hote hian Bournemouth aṭangin defender Nathan Ake an lalut hnai bawk.

Kum 20 mi Torres hian kum nga daih contract a ziak a, Man City hian July 3-a Bayern Munich pantu Leroy Sane a thlak ang.

Torres chuan, "Player zawng zawngin attacking game khel ṭhin team tana khelh an châk a, Manchester City hi khawvela attacking uar ber team zinga mi an ni. City ka zawm thei ka lawm takzet," tiin a sawi.

Foios, Spain-ah Torres hi February 29, 2000 khan a piang a, kum ruk mi a nihin Valencia zawmin club dang tan a la khel lo. 

Valencia senior team tan Torres hian  November 30, 2017 khan a khel ṭan a, Copa del Rey-ah  Real Zaragoza chu 4-1 in an sawp. December 16, 2017-ah La Liga-ah a inlan a, kum 2000 china piang La Liga khel thei hmasa ber a ni.

Torres hian Valencia tan season thum a khel tawh a, season hman zawh takah khan hmun pawimawh changin league-ah ringawt pawh vawi 34 inlanin goal li a khung. City director of football Txiki Begiristain chuan, "Ferran hi kan zirchiang a, a hmasawn chhoh danah hian kan lungawi a ni. A kum a la naupang a, hma a sawn zel a, a theihna hi winger atana kan duh tak a ni. A che rang a, hmun awl a insiam thiam a, hun pawimawhah danglamna thlen thei tur player a ni," tiin a fak hle.